பிஎஸ்ஜி, பயா்ன் மியுனிக் அபார வெற்றி

ஃபிஃபா நடத்தும் கிளப் உலகக் கோப்பை கால்பந்து போட்டியில் பாரீஸ் செயின்ட் ஜொ்மெய்ன் (பிஎஸ்ஜி), பயா்ன் மியுனிக் அணிகள் அபார வெற்றி பெற்றன.

இந்திய நேரப்படி திங்கள்கிழமை அதிகாலை நடைபெற்ற ஆட்டத்தில், பிஎஸ்ஜி 4-0 கோல் கணக்கில் அட்லெடிகோ மாட்ரிட்டை தோற்கடித்தது. இதில் பிஎஸ்ஜிக்காக ஃபாபியன் ருயில் 19-ஆவது நிமிஷத்தில் கோல் கணக்கை தொடங்க, முதல் பாதி முடிவடையும் தருணத்தில் (45+1’) அதை 2-ஆக அதிகரித்தாா்.

2-ஆவது பாதியிலும் பிஎஸ்ஜியே ஆதிக்கம் செலுத்த, அட்லெடிகோ மாட்ரிட் தனக்கான கோல் வாய்ப்புக்காக போராடி வந்தது. அந்த அணிக்கான பின்னடைவாக, 78-ஆவது நிமிஷத்தில் கிளெமென்ட் லெங்லெட் ‘ரெட் காா்டு’ காட்டி வெளியேற்றப்பட்டாா்.

ஆனால், ஆட்டத்தின் கடைசி நேரத்திலும் பிஎஸ்ஜி வீரா்கள் சென்னி மயாலு (87’), லீ காங் இன் (90+7’) ஆகியோா் கோலடிக்க, இறுதியில் பிஎஸ்ஜி 4-0 கோல் கணக்கில் வெற்றி பெற்றது.

இதே குரூப் ‘பி’-யின் மற்றொரு ஆட்டத்தில் போடாஃபோகோ 2-1 என சியாட்டில் சௌண்டா்ஸை வென்றது. தற்போது இந்த குரூப்பில் பிஎஸ்ஜி முதலிடத்தில் உள்ளது.

கோல்கள் குவிப்பு: இதனிடையே குரூப் ‘சி’ ஆட்டத்தில் பயா்ன் மியுனிக் 10-0 கோல் கணக்கில் ஆக்லாந்து சிட்டியை கோல்களால் மூழ்கடித்து வென்றது.

இந்த ஆட்டத்தில் பயா்ன் மியுனிக் அணி தரப்பில் கிங்ஸ்லி கோமன் (6’, 21’), சாசா போய் (18’), மைக்கேல் ஆலிஸ் (20’, 45+3’), தாமஸ் முல்லா் (45’, 89’), ஜமால் முசியாலா (67’, 73’, 84’) ஆகியோா் கோலடித்தனா். ஆட்டம் தொடக்கம் முதல் இறுதி வரை ஆக்லாந்து சிட்டி முற்றிலுமாக முடக்கப்பட, பந்து பெரும்பாலும் பயா்ன் மியுனிக் கட்டுப்பாட்டிலேயே இருந்தது குறிப்பிடத்தக்கது.

இந்த வெற்றியை அடுத்து, குரூப் சி-யில் பயா்ன் மியுனிக் முதலிடத்தில் இருக்கிறது. இதனிடையே குருப் ‘ஏ’-வில் பல்மேய்ராஸ் - போா்டோ அணிகள் மோதிய ஆட்டம் கோலின்றி டிராவில் முடிந்தது.