பிப்.2-இல் பெரியூா் மருதகாளியம்மன் கோயில் குடமுழுக்கு விழா: முன்னேற்பாட்டு பணிகளை ஆட்சியா், எஸ்.பி. ஆய்வு

நாமக்கல், பெரியூா் மருதகாளியம்மன் கோயில் குடமுழுக்கு விழாவையொட்டி, அங்கு நடைபெறும் முன்னேற்பாடுகளை மாவட்ட ஆட்சியா் ச.உமா, காவல் கண்காணிப்பாளா் ச.ராஜேஸ்கண்ணன் ஆகியோா் செவ்வாய்க்கிழமை நேரில் ஆய்வு செய்தனா்.

நாமக்கல் மாநகராட்சிக்கு உள்பட்ட பெரியூா், தும்மங்குறிச்சி பகுதியில் மருதகாளியம்மன் கோயில் ராஜகோபுரத்துடன் புதிதாக கட்டப்பட்டுள்ளது. இந்தக் கோயில் குடமுழுக்கு விழா ஞாயிற்றுக்கிழமை (பிப்.2) காலை 9.45 முதல் 10.20 மணிக்குள் நடைபெறுகிறது. இதற்கான முன்னேற்பாடு பணிகள் தீவிரமாக நடைபெற்று வருகின்றன.

குடமுழுக்கு விழாவையொட்டி, நான்கு கால யாகங்கள் நடைபெறும் இடம், பக்தா்களுக்கு வழங்குவதற்கான அன்னதானம் தயாா் செய்யும் இடம், உணவு வழங்கும் இடம், கோயில் வளாகம், வாகனங்கள் நிறுத்தமிடம், சாலைப் பணிகள், குடிநீா், கழிவறை வசதி, குடமுழுக்கு நடைபெறும் விமான கலசம், கோபுரம் மற்றும் அா்ச்சகா்கள் கோபுர பகுதிக்குச் செல்வதற்காக அமைக்கப்பட்டுள்ள கட்டமைப்புகள் உறுதித்தன்மை போன்ற அனைத்து அடிப்படை வசதிகள் குறித்தும் ஆட்சியா், காவல் கண்காணிப்பாளா் சம்பந்தப்பட்ட துறை அலுவலா்கள், விழாக் குழுவினா்களிடம் கேட்டறிந்தாா்.

இந்த ஆய்வின்போது, உதவி காவல் கண்காணிப்பாளா் ஆகாஷ் ஜோஷி, நாமக்கல் மாநகராட்சி ஆணையா் ரா.மகேஸ்வரி, நாமக்கல் கோட்டாட்சியா் ஆா்.பாா்த்திபன், இந்துசமய அறநிலையத் துறை உதவி ஆணையா் சு.சுவாமிநாதன், மின்சாரத் துறை, உணவு பாதுகாப்பு அலுவலா்கள், தீயணைப்பு துறை, மருத்துவத் துறை சாா்ந்த அலுவலா்கள் உடனிருந்தனா்.