பிரதமர் வீடு கட்டும் திட்டம்: கட்டாத வீட்டுக்கு வாழ்த்து மடல்; தொழிலாளர் அதிர்ச்சி; நடந்தது என்ன?

நீலகிரி மாவட்டம் பந்தலூர், நெல்லியாளம் நகராட்சிக்கு உட்பட்ட இரும்பு பாலம் பகுதியில் வாடகை வீடு ஒன்றில் வசித்து வருகின்றனர் பன்னீர்செல்வம் - மகேஷ்வரி தம்பதியர். கூலித் தொழிலாளர்களான இவர்களுக்குப் பிரதம மந்திரி நகர்ப்புற வீட்டுவசதி திட்டம், டெல்லியிலிருந்து கடிதம் ஒன்று அனுப்பப்பட்டுள்ளது. அக்கடிதத்தில், "பிரதம மந்திரி நகர்ப்புற வீட்டுவசதி திட்டத்தின் கீழ் நீங்கள் புதிய வீட்டினைப் பெற்றமைக்கு வாழ்த்துகள். இந்த திட்டம் உங்களுக்குப் புதிய வீடு மட்டுமின்றி சுயமரியாதையும் சமூக முன்னேற்றத்தையும் வழங்கியிருக்கிறது.

உங்கள் புதிய வீட்டினைத் தூய்மையாக வைத்திருப்பதோடு, திடக்கழிவு மேலாண்மை, பாதுகாப்பான குடிநீர், எரிபொருள் சிக்கனம், மரம் நடுதல் போன்றவற்றிலும் கவனம் செலுத்துவீர்கள் என நம்புகிறேன்" எனக் குறிப்பிடப்பட்டுள்ளது. இதைக் கண்டு அதிர்ச்சியடைந்த அந்த குடும்பத்தினர் வீட்டைக் கண்டுபிடித்துக் கொடுங்கள் என உள்ளாட்சி நிர்வாகிகளிடம் முறையிட்டு வருகின்றனர்.

இது குறித்துத் தெரிவித்த தொழிலாளர் மகேஷ்வரி, "நிரந்தர வேலை இல்லாமல் 3 குழந்தைகளை வைத்துக்கொண்டு வாடகை வீட்டில் சிரமப்பட்டு வருகிறோம். மாமனார் வழங்கிய 4 சென்ட் நிலத்தில் வீடு கட்ட முடியாமல் தவித்து வரும் நிலையில், காட்டாத வீட்டைக் கட்டிக் கொடுத்ததாக வாழ்த்து அனுப்பியது எந்த விதத்தில் நியாயம். முறையான விசாரணை நடத்தி உண்மையைக் கண்டறிய வேண்டும்" என்றார்.

இது குறித்துத் தெரிவித்த நெல்லியாளம் நகராட்சி அதிகாரிகள், "இவர்கள் வசிக்கும் வாடகை வீட்டின் முகவரி, தம்பதியர் பெயர் எல்லாமே சரியாக இருக்கின்றது. ஆனால், வீடு தான் கட்டிக்கொடுக்கப்படவில்லை. இவருக்குத் தெரியாமல் இவர்களின் பெயரில் ஏதேனும் முறைகேடு நடந்துள்ளதா அல்லது அலுவல் அலட்சியப் பிழையா என்பது குறித்து விசாரணை நடத்தி வருகிறோம்" என்றனர்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MadrasNallaMadras