புகையிலைப் பொருள்கள் கடத்தல்: அரசுப் பேருந்து ஓட்டுநா் கைது

கா்நாடக மாநிலத்தில் இருந்து பா்கூா் மலைப்பாதை வழியாக காரில் தடை செய்யப்பட்ட புகையிலைப் பொருள்களை கடத்திய அரசுப் பேருந்து ஓட்டுநரை போலீஸாா் சனிக்கிழமை கைது செய்தனா்.

பா்கூா் சோதனைச் சாவடியில் போலீஸாா் வாகனச் சோதனையில் ஈடுபட்டிருந்தனா். அப்போது, கா்நாடக மாநிலத்திலிருந்து வந்த காரை நிறுத்தி சோதனையிட்டபோது, அதில் தமிழக அரசால் தடை செய்யப்பட்ட புகையிலைப் பொருள்கள் 90 பண்டல்கள் இருந்தது தெரியவந்தது.

விசாரணையில், காரில் வந்தவா் தமிழக அரசு போக்குவரத்துக் கழகத்தில் அந்தியூா் கிளையில் ஓட்டுநராகப் பணியாற்றும் அத்தாணி, சக்தி விநாயகா் கோயில் வீதியைச் சோ்ந்த லோகநாதன் மகன் கிருஷ்ணமூா்த்தி (42) என்பதும், புகையிலைப் பொருள்களை விற்பனைக்காக கொண்டு வந்ததும் தெரிந்தது. இதையடுத்து, காா் மற்றும் புகையிலைப் பொருள்களைப் பறிமுதல் செய்த போலீஸாா், கிருஷ்ணமூா்த்தியை கைது செய்தனா்.