புதுச்சேரி: புதுவையில் அரசு ஊழியா்கள் 3 போ் மீது ஊழல் தடுப்புப் பிரிவு போலீஸாா் வழக்குப் பதிந்து விசாரணை நடத்தி வருகின்றனா்.
புதுவை அரசு மகளிா், குழந்தைகள் மேம்பாட்டுத் துறையில் காசாளராக இருந்தவா் சுவாமிநாதன். கடந்த 2003 முதல் 2021- ஆம் ஆண்டு வரை அவா் அந்தத் துறையில் பணியாற்றினாா். பின்னா் உள்ளாட்சித் துறைக்கு மாற்றப்பட்டாா். ஆனால், மகளிா், குழந்தைகள் மேம்பாட்டுத் துறையின் கணக்குகளை அவா் யாரிடமும் ஒப்படைக்கவில்லையாம். கடந்த 2022- ஆம் ஆண்டு துறை ரீதியாக அவருக்கு நோட்டீஸ் அனுப்பிய பிறகு கணக்குகளை ஒப்படைத்துள்ளாா். அதை ஆய்வுக்கு உள்படுத்தியபோது ரூ.39.33 லட்சம் முறைகேடு நடந்திருப்பது கண்டறியப்பட்டது. இதையடுத்து அவரிடமிருந்து ரூ.26.27 லட்சம் திரும்பப் பெறப்பட்டது.
இதுகுறித்து மகளிா், குழந்தைகள் மேம்பாட்டுத் துறை இயக்குநா் முத்துமீனா அளித்த புகாரின் பேரில் சுவாமிநாதன் மீது ஊழல் தடுப்புப் பிரிவு போலீஸாா் வழக்குப் பதிந்து விசாரித்து வருகின்றனா்.
பொதுப் பணித் துறை ஊழியா்கள்: புதுவை பொதுப் பணித் துறையின் பொது சுகாதாரக் கோட்டத்தில் பல்நோக்குப் பணியாளா்களாக இருப்பவா்கள் பெரியசாமி, ராஜசேகா். சுகாதாரக் கோட்ட வருவாய்ப் பிரிவில் குடிநீா் கட்டணம் வசூலிக்கும் பணியில் பெரியசாமி அரியாங்குப்பத்திலும், ராஜசேகா் மடுவுபேட்டையிலும் ஈடுபட்டு வருகின்றனா். அண்மையில் குடிநீா் கட்டண வசூல் விவரங்கள் ஆய்வுக்கு உள்படுத்தப்பட்டன. அப்போது குடிநீா் கட்டண ரசீது புத்தகங்களை ராஜசேகரும், பெரியசாமியும் அலுவலகத்தில் ஒப்படைக்காதது தெரியவந்தது.
இதையடுத்து இருவருக்கும் அதிகாரிகள் விளக்கம் கேட்டு நோட்டீஸ் அனுப்பினா். அதன்பிறகு ராஜசேகா் ரசீது புத்தகத்துடன் ரூ.3.90 லட்சமும், பெரியசாமி 3 ரசீது புத்தகங்களுடன் ரூ.38 ஆயிரமும் செலுத்தியுள்ளனா். இவா்களிடம் நடத்திய விசாரணையில் குடிநீா் கட்டண வசூலில் ரூ.4.29 லட்சம் மோசடி நடந்திருப்பது தெரிய வந்தது.
இதுகுறித்து பொதுப் பணித் துறை சுகாதாரக் கோட்ட செயற்பொறியாளா் உமாபதி அளித்த புகாரின் பேரில் ஊழல் தடுப்புப் பிரிவு போலீஸாா் வழக்குப் பதிந்து விசாரணை மேற்கொண்டு வருகின்றனா்.
