பெண் கொலை வழக்கில் காதலன் கைது

ஸ்ரீபெரும்புதூா் அருகே இளம்பெண் கொலை செய்யப்பட்ட வழக்கில் அவரது காதலன் கைது செய்யப்பட்டாா்.

ஸ்ரீபெரும்புதூா் அடுத்த கொளத்தூா் பஜனைக் கோயில் தெருவைச் சோ்ந்த எல்லப்பன். இவரது மகள் விக்னேஷ்வரி (24). இவா் புதன்கிழமை கொளத்தூா் சுடுகாடு அருகே ஸ்ரீபெரும்புதூா்-தாம்பரம் சாலையோரம் தலையில் பலத்த காயங்களுடன் இறந்து கிடந்தாா்.

இந்த சம்பவம் குறித்து ஸ்ரீபெரும்புதூா் போலீஸாா் வழக்குப் பதிவு செய்து விசாரித்து வந்தனா்.

விசாரணையில், விக்னேஷ்வரியும் புதுக்கோட்டையை சோ்ந்த தீபனும் கடந்த 5 ஆண்டுகளாக காதலித்து வந்ததும், செவ்வாக்ய்கிழமை இரவு தீபன் கைப்பேசியில் அழைத்ததால் இருசக்கர வாகனத்தில் சென்ற விக்னேஷ்வரி காயங்களுடன் இறந்து கிடந்ததால் ஸ்ரீபெரும்புதூா் போலீஸாா் தீபனை கைது செய்து விசாரித்தனா்.

விசாரணையில், திருமணம் செய்து கொள்ளும்படி விக்னேஷ்வரி காதலன் தீபனிடம் வற்புறுத்தி வந்ததும், காதலுக்கு சம்மதம் தெரிவித்த விக்னேஷ்வரியின் குடும்பத்தினா் இருவருக்கும் திருமண ஏற்பாடுகள் நடைபெற்ற நிலையில், விக்னேஷ்வரியை தொடா்பு கொண்ட தீபன் கொளத்தூா் சுடுகாடு அருகே வருமாறு அழைத்துள்ளாா்.

இதையடுத்து அங்கு வந்த விக்னேஷ்வரியிடம் தனது குடும்ப சூழ்நிலை தற்போது சரியில்லை. எனவே தற்போது திருமணம் வேண்டாம் என்று கூறியுள்ளாா். இதனால் இருவருக்கும் இடையே தகராறு ஏற்பட்டுள்ளது. இதில் ஆத்திரம் அடைந்த தீபன் அருகில் இருந்த கல்லால் விக்னேஷ்வரியை தாக்கி கொலை செய்துவிட்டு விபத்து போன்று சாலையோரம் உடலை வீசிச் சென்றது தெரிய வந்தது.

இதையடுத்து ஸ்ரீ பெரும்புதூா் போலீஸாா் தீபனை கைது செய்து சிறையில் அடைத்தனா்.