ஸ்ரீபெரும்புதூா் அருகே இளம்பெண் கொலை

ஸ்ரீபெரும்புதூா் அருகே இளம்பெண் கல்லால் அடித்துக் கொல்லப்பட்டாா்.

காஞ்சிபுரம் மாவட்டம், ஸ்ரீபெரும்புதூா் அடுத்த கொளத்தூா் பகுதியை சோ்ந்த எல்லப்பன் மகள் விக்னேஸ்வரி (24). இவா் பிள்ளைப்பாக்கம் பகுதியில் இயங்கி வரும் தனியாா் ஆலையில் பணியாற்றி வந்தாா். இந்த நிலையில், விக்னேஸ்வரியும், புதுக்கோட்டை மாவட்டத்தை சோ்ந்த தீபன் (27) என்பவரும் காதலித்து வந்துள்ளனா்.

வரும் வெள்ளிக்கிழமை பெண் வீட்டாா் சம்மதத்துடன் இருவருக்கும் திருமணம் நடக்க இருந்ததாக தெரிகிறது. இதற்காக செவ்வாய்க்கிழமை விக்னேஸ்வரி வீட்டிற்கு வந்த தீபன் அவரை தாம்பரம் அழைத்து சென்று புத்தாடைகள் வாங்கி வந்துள்ளாா்.

இதையடுத்து தீபன் தாம்பரம் செல்வதாக பேருந்தில் சென்றவா், மணிமங்கலத்தில் இறங்கிவிட்டதாகவும் தன்னை வந்து அழைத்துச் செல்லும் படி விக்னேஸ்வரிக்கு கைப்பேசி தகவல் தெரிவித்துள்ளாா். இதையடுத்து விக்னேஸ்வரி தனது இருசக்கர வாகனத்தில் சென்றுள்ளாா். வெகு நேரம் ஆகியும் அவா் திரும்பி வராததால் உறவினா்கள் இருவரையும் தேடி உள்ளனா்.

இந்தநிலையில், புதன்கிழமை விக்னேஸ்வரியின் இருசக்கர வாகனம், கொளத்தூா் சுடுகாடு அருகே மின்கம்பத்தில் மோதி விபத்தில் சிக்கியது போன்று இருந்துள்ளது. அருகிலேயே விக்னேஸ்வரி தலையில் பலத்த காயங்களுடன் இறந்து கிடப்பதை கண்ட அப்பகுதி பொதுமக்கள் உறவினா்களுக்கு தகவல் தெரிவித்துள்ளனா். சம்பவ இடத்திற்கு வந்த விக்னேஸ்வரியின் உறவினா்கள் சடலத்தை வீட்டுக்கு எடுத்துச் சென்றுள்ளனா்.

தகவல் அறிந்த ஸ்ரீபெரும்புதூா் போலீஸாா் விக்னேஸ்வரியின் உடலை மீட்டு பிரேத பரிசோதனைக்காக ஸ்ரீபெரும்புதூா் அரசு மருத்துவமனைக்கு அனுப்பி வைத்து வழக்குப் பதிவு செய்து விசாரணை நடத்தி வருகின்றனா்.

விசாரணையில், விக்னேஸ்வரி தலையில் கல்லால் தாக்கப்பட்டு கொலை செய்யப்பட்டு, மின்கம்பத்தில் இருசக்கர வாகனம் மோதி விபத்தில் உயிரிழந்தது போல சடலத்தை வீசிச் சென்றது தெரியவந்தது.

அவரது காதலன் தீபனின் கைப்பேசி அணைக்கப்பட்டு தலைமறைவாக உள்ளதால் அவரை தேடும் பணியில் போலீஸாா் ஈடுபட்டுள்ளனா்.