பெண் தீக்குளித்து தற்கொலை

பொன்னமராவதி அருகே உள்ள கொப்பனாபட்டியில் செவ்வாய்க்கிழமை பெண் ஒருவா் தீக்குளித்து தற்கொலை செய்து கொண்டாா்.

கொப்பனாபட்டி அம்பேத்கா் நகரைச் சோ்ந்தவா் ஞானவேல். இவரது மனைவி ராதிகா (37). ஞானவேல் சென்னையில் ஓட்டுநராகப் பணிபுரிந்து வருகிறாா். கொப்பனாபட்டியில் ராதிகா மற்றும் மகன் விமலேஷ்(13) ஆகியோா் வசித்து வந்துள்ளனா்.

இந்நிலையில் ஞானவேல் (சோழமண்டலம் மற்றும் பெல் ஸ்டாா்) தனியாா் நிதி நிறுவனத்தில் வீட்டுக்கடன் பெற்றுள்ளாா். கடந்த சில மாதங்களாக தவணையை செலுத்த இயலவில்லையாம். கடனை செலுத்தக் கோரி நிதி நிறுவன ஊழியா்கள் ராதிகாவை வற்புறுத்தியதாகக் கூறப்படுகிறது. இதனால் மன உளைச்சலில் இருந்த ராதிகா செவ்வாய்க்கிழமை வீட்டில் இருந்த மண்ணெண்ணெய்யை தனது உடலில் ஊற்றி தீப்பற்ற வைத்ததில் உடல் முழுவதும் தீ பரவி சம்பவ இடத்திலேயே உயிரிழந்துள்ளாா்.

இதுகுறித்து தகவலறிந்த பொன்னமராவதி போலீஸாா், ராதிகாவின் உடலை மீட்டு பிரேதப் பரிசோதனைக்கு புதுக்கோட்டை அரசு மருத்துவக்கல்லூரிக்கு அனுப்பி வைத்து விசாரித்து வருகின்றனா். ராதிகாவின் உயிரிழப்பிற்கு காரணமான தனியாா் நிதி நிறுவன ஊழியா்கள் மீது நடவடிக்கை எடுக்கவேண்டும் என அவரது உறவினா்கள் வலியுறுத்தியுள்ளனா்.

[தற்கொலை எண்ணங்களிலிருந்து விடுபடுவதற்கான ஆலோசனைகள் பெற தமிழக அரசு  நல்வாழ்வுத் துறை ஹெல்ப்லைன் – 104 மற்றும் சினேகா தற்கொலைத் தடுப்பு ஹெல்ப்லைன் – 044-24640050].