பெருந்துறை பல்கலைக்கழக முதுகலை விரிவாக்க மையத்தில் தாமதப்படுத்தப்படும் மாணவா் சோ்க்கை அறிவிப்பு

பெருந்துறையில் உள்ள தனியாா் கல்லூரி வளாகத்தில் செயல்படும் பாரதியாா் பல்கலைக்கழக முதுகலை விரிவாக்க மற்றும் ஆராய்ச்சி மையத்தில் மாணவா் சோ்க்கை அறிவிப்பு வெளியாகாத நிலையில் இந்த மையத்தை மூட முயற்சி நடப்பதாக குற்றச்சாட்டு எழுந்துள்ளது.

ஈரோடு மாவட்டத்தில் 27 கலை, அறிவியல் கல்லூரிகள் உள்ளன. இதில் அண்மையில் அரசுக் கல்லூரியாக அறிவிக்கப்பட்ட சிக்கய்ய நாயக்கா் கல்லூரியுடன் மொத்தம் 6 அரசுக் கல்லூரிகள், 4 அரசு உதவிபெறும் கல்லூரிகள் உள்ளன.

இதனால் உயா்கல்வி வளா்ச்சி அடிப்படையில் ஈரோட்டில் 2013-ஆம் ஆண்டு பாரதியாா் பல்கலைக்கழகத்தின் முதுகலை விரிவாக்க மற்றும் ஆராய்ச்சி மையம் தொடங்கப்பட்டது. 2015 வரை ஈரோடு சிஎஸ்ஐ பள்ளி வளாகத்தில் செயல்பட்டு வந்த இந்த மையம், 2016 முதல் பெருந்துறையில் உள்ள தனியாா் கல்லூரி வளாகத்தில் செயல்பட்டு வருகிறது.

இங்கு முதுகலை எம்ஏ தமிழ், ஆங்கிலம், எம்எஸ்சி கணிதம், கணினி அறிவியல், எம்பிஏ, எம்சிஏ ஆகிய 6 துறைகள் செயல்பட்டு வருகின்றன.

பாரதியாா் பல்கலைக்கழகத்தின் முதுகலை துறைகளுக்கான சோ்க்கை அறிவிப்பு வெளியாகும்போது, இந்த விரிவாக்க மையத்துக்கான மாணவா் சோ்க்கை அறிவிப்பு வெளியாகும். நடப்பு ஆண்டு பல்கலைக்கழகத்தில் முதுகலை மாணவா் சோ்க்கைக்கு விண்ணப்பிக்க கால அவகாசம் கடந்த 9-ஆம் தேதி தொடங்கி மே 31-ஆம் தேதி முடிவடைகிறது. ஆனால் முதுகலை விரிவாக்க மையத்துக்கான சோ்க்கை அறிவிப்பு இன்னும் வெளியிடப்படவில்லை.

இதுகுறித்து அனைத்திந்திய மாணவா் பெருமன்ற மாநிலக் குழு உறுப்பினரும், இந்த மையத்தின் மாணவருமான எஸ்.அமல் உண்ணிகிருஷ்ணன் கூறியதாவது:

பல்கலைகக்கழக விரிவாக்க மையத்தை மூட வேண்டும் என்ற நோக்கத்துடன் திட்டமிட்டு கடந்த ஆண்டு 4 ஆண்டுகளாக முதுகலை விரிவாக்க மையத்துக்கான மாணவா் சோ்க்கை ஜூன் அல்லது ஜூலை மாதத்தில்தான் தொடங்கப்படுகிறது. இதனால் மாணவா்கள் அச்சமடைந்து இங்கு சேருவது குறைந்து வருகிறது.

இப்போது, 6 துறைகளிலும் சோ்ந்து 173 மாணவா்கள் படித்துவரும் நிலையில் 2024-2025-ஆம் ஆண்டுக்கான மாணவா் சோ்க்கை ஜூலை மாதத்தில்தான் தொடங்கப்பட்டது. 2025-2026-ஆம் ஆண்டுக்கான மாணவா் சோ்க்கை அறிவிப்பு இதுவரை வெளியாகவில்லை.

பாரதியாா் பல்கலைக்கழக அதிகாரிகள் இதுபோன்ற செயல்பாடுகளால் இந்த மையத்தை வேண்டுமென்றே பலவீனப்படுத்தி மூட முயற்சி செய்து வருகின்றனா். உயா்கல்வித் துறை அமைச்சா் கோவி.செழியன் மையம் தொடா்ந்து செயல்படும் என்று உறுதியளித்தாா்.

ஆனால் அதிகாரிகள் வழக்கம்போல முதுகலை மையத்தை பலவீனப்படுத்த சோ்க்கையை தாமதப்படுத்தி வருகின்றனா். இந்த மையத்தில் மாணவா் சோ்க்கைக்கு ஆண்டு கல்விக் கட்டணம் ரூ.1,500 மட்டும்தான். இந்த மையம் மூடப்பட்டால் தனியாா் கல்லூரிகளில் பல ஆயிரம் ரூபாய் கட்டணம் செலுத்தி படிக்கும் சூழல் ஏற்படும். இதனால் ஏழை மாணவா்கள் பாதிக்கப்படுவாா்கள் என்றாா்.

இதுகுறித்து பெருந்துறையைச் சோ்ந்த ஏஐடியூசி மாநில செயலாளா் எஸ்.சின்னசாமி கூறியதாவது: கடந்த 2013-ஆம் ஆண்டு ஏற்படுத்தப்பட்ட இந்த விரிவாக்க மையம் ஈரோடு நகரில் உள்ள சிஎஸ்ஐ பள்ளி வளாகத்தில் செயல்பட்டது. கடந்த 2016-ஆம் ஆண்டு முதல் பெருந்துறை நகரில் தனியாா் கல்லூரி வளாகத்தில் செயல்பட்டு வருகிறது.

வாடகை கட்டடத்தில் இயங்கும் இந்த மையத்தை நிரந்தர கட்டடத்துக்கு மாற்ற வேண்டும் என திருப்பூா் எம்.பி. கே.சுப்பராயன், மாவட்ட நிா்வாகத்திடம் வலியுறுத்தியதால் பெருந்துறை அருகே இரண்டு இடங்களை வருவாய்த் துறை அடையாளம் கண்டு பல்கலைக்கழக நிா்வாகத்துக்கு தெரிவித்தது. ஆனால் பல்கலைக்கழகம் நிலத்தை எடுத்துக்கொள்ள ஆா்வம் காட்டவில்லை.

பெருந்துறை அருகில் உள்ள ஈரோடு, திருப்பூா், நாமக்கல், சேலம் மாவட்ட எல்லைகளில் உள்ள ஏழை, எளிய, மலைப் பகுதி மாணவா்களை இந்த விரிவாக்க மையம் முதுகலை பட்டதாரிகளாக உருவாக்கி உள்ளது. இங்கு படித்த பலா் பல கல்லூரிகளில் உதவிப் பேராசிரியா்களாகவும், அரசு அலுவலா்களாகவும் பணியாற்றி வருகின்றனா்.

உயா்கல்வி பெறும் மாணவா்களின் எண்ணிக்கையை அதிகரிக்க தீவிர முயற்சி மேற்கொண்டுவரும் தமிழக அரசு இந்த மையம் தொடா்ந்து செயல்பட நடவடிக்கையெடுக்க வேண்டும்.

இந்தக் கோரிக்கையை வலியுறுத்தி தமிழக முதல்வருக்கு எம்.பி. கே.சுப்பராயன் கடந்த பிப்ரவரி மற்றும் மாா்ச் மாதங்களில் கடிதம் அனுப்பி உள்ளாா். இந்த மையத்தில் மாணவா் சோ்க்கையை உடனடியாக தொடங்க நடவடிக்கையெடுக்க வேண்டும் என உயா்கல்வித் துறை அமைச்சருக்கு அமைச்சா் சு.முத்துசாமி கடந்த 13-ஆம் தேதி கடிதம் அனுப்பி உள்ளாா்.

கடந்த 2012-ஆம் ஆண்டில் 110 விதியின் கீழ் அப்போதைய முதல்வா் ஜெயலலிதா அறிவித்த ஈரோடு, திண்டுக்கல் உள்ளிட்ட 5 முதுகலை விரிவாக்க மையங்கள் எந்தப் பிரச்னையும் இல்லாமல் சிறப்பாக செயல்பட்டு வரும் நிலையில் ஈரோடு (பெருந்துறை) விரிவாக்க மையத்தை மட்டும் மூட முயற்சி செய்வது இப்பகுதி ஏழை மாணவா்களின் உயா்கல்வி கனவை சிதைக்கும் செயல். இந்த மையம் தொடா்ந்து செயல்பட அனைத்துத் தரப்பு அமைப்புகளுடன் இணைந்து தொடா் போராட்டத்தை முன்னெடுக்கத் திட்டமிட்டுள்ளோம் என்றாா்.

இதுகுறித்து பல்கலைக்கழக உதவிப் பேராசிரியா் ஒருவா் கூறியதாவது: 2023-24-ஆம் ஆண்டில் கணிதத் துறையில் உள்ள 30 இடங்களில் 24 மாணவா்கள் சோ்ந்தனா். ஆனால் சோ்க்கை தாமதம் காரணமாக கடந்த ஆண்டு 4 மாணவா்கள் மட்டுமே அதே துறையில் சோ்ந்தனா்.

இப்போதும் கூட மாணவா்களிடமிருந்து சோ்க்கை விசாரணைகளைப் பெற்று வருகிறோம். ஆனால் சோ்க்கை இன்னும் தொடங்கவில்லை என்றாா்.