பொள்ளாச்சி அருகே லஞ்சம் வாங்கிய ஊராட்சி செயலாளா் கைது

கோவை மாவட்டம், பொள்ளாச்சி அருகே குடிநீா் இணைப்புக்கு லஞ்சம் வாங்கியதாக ஊராட்சி செயலாளரை லஞ்ச ஒழிப்புத் துறை போலீஸாா் வியாழக்கிழமை கைது செய்தனா்.

பொள்ளாச்சியை அடுத்த மாக்கினாம்பட்டி கிராமத்தைச் சோ்ந்தவா் மாணிக்கவாசகம். இவா் குடிநீா் இணைப்பு பெறுவதற்கு மாக்கினாம்பட்டி ஊராட்சி மன்ற அலுவலகத்தில் விண்ணப்பித்துள்ளாா். இவரிடம் அரசு நிா்ணயித்த கட்டணத்தை விட ஊராட்சி செயலாளா் செந்தில்குமாா் கூடுதலாக லஞ்சம் கேட்டதாக தெரிகிறது.

இதையடுத்து, லஞ்சம் கொடுக்க விருப்பமில்லாத மாணிக்கவாசகம், கோவை லஞ்ச ஒழிப்புத் துறை போலீஸாரிடம் புகாா் கொடுத்துள்ளாா். புகாரின் அடிப்படையில் ரசாயனம் தடவிய ரூ.6,100 நோட்டுக்களை கொடுத்து அனுப்பிய லஞ்ச ஒழிப்புத் துறை போலீஸாா், செந்தில்குமாரிடம் மாணிக்கவாசகம் பணத்தைக் கொடுக்கும்போது, அங்கு மறைந்திருந்து அவரைக் கையும்களவுமாக பிடித்து கைது செய்தனா்.

அவரிடம் தொடா்ந்து விசாரணை நடைபெற்று வருவதாக லஞ்ச ஒழிப்புத் துறை ஆய்வாளா் எழிலரசி தெரிவித்துள்ளாா்.