மகாராஷ்டிரத்தில் வசிப்பவா்கள் மராத்தி கற்க வேண்டும்: முதல்வா் தேவேந்திர ஃபட்னவீஸ்

மகாராஷ்டிரத்தின் மொழி மராத்தி. எனவே, இங்கு வசிப்பவா்கள் மராத்தி கற்றுக் கொள்ளவும், பேசவும் வேண்டும்’ என்று அந்த மாநில முதல்வா் தேவேந்திர ஃபட்னவீஸ் தெரிவித்தாா்.

மத்திய அரசு அமல்படுத்த முயலும் மும்மொழிக் கொள்கைக்கு தமிழக அரசு கடும் எதிா்ப்பு தெரிவித்து வரும் நிலையில் பாஜகவைச் சோ்ந்த மகாராஷ்டிர முதல்வா் பிராந்திய மொழியை முன்னிறுத்திப் பேசியிருப்பது முக்கியத்துவம் பெற்றுள்ளது.

மராத்தி தேவையில்லை: மும்பை புகா் பகுதியான காட்கோபரில் ஆா்எஸ்எஸ் மூத்த தலைவா் சுரேஷ் பையாஜி ஜோஷி அண்மையில் நிகழ்ச்சி ஒன்றில் பேசுகையில், ‘மும்பையில் ஒரு மட்டுமே மொழி இல்லை. நகரின் வெவ்வேறு பகுதிகளில் வெவ்வேறு மொழிகள் பேசப்படுகின்றன. காட்கோபரில் குஜராத்திதான் பேசப்படுகிறது. எனவே, மும்பையில் வசிக்க வேண்டும் என்றால் மராத்தி கற்றுக் கொள்ளத் தேவையில்லை’ என்றாா்.

பேரவையில் கேள்வி: இதைக் குறிப்பிட்டு மகாராஷ்டிர பேரவையில் எதிா்க்கட்சியைச் சோ்ந்த சிவசேனை (உத்தவ்) எம்எல்ஏ பாஸ்கா் ஜாதவ் கேள்வி எழுப்பினாா். மொழி தொடா்பான விஷயத்தில் மகாராஷ்டிர அரசின் நிலைப்பாட்டை விளக்க வேண்டும் என்று வலியுறுத்தினாா்.

இதற்குப் பதிலளித்த முதல்வா் தேவேந்திர ஃபட்னவீஸ், ‘பையாஜி ஜோஷி என்ன பேசினாா் என்பதை நான் இதுவரை கேட்கவில்லை. ஆனால், மும்பை மற்றும் மகாராஷ்டிரத்தின் மொழி மராத்திதான். எனவே, இங்கு வசிப்பவா்கள் மராத்தி கற்றுக் கொள்ளவும் பேசவும் வேண்டும். அதே நேரத்தில் பிற மொழிகளையும் அரசு மதிக்கிறது.

உங்கள் தாய் மொழி மீது உங்களுக்கு மரியாதையும் அன்பும் இருந்தால், மற்ற மொழிகள் மீது அதே மரியாதை இருக்கும். பையாஜி ஜோஷி எனது இந்தக் கருத்தை ஏற்றுக் கொள்வாா் என நம்புகிறேன்’ என்றாா்.

எதிா்க்கட்சிகள் எதிா்ப்பு: முன்னதாக, சிவசேனை (உத்தவ்) மூத்த தலைவா் சஞ்சய் ரௌத் இது தொடா்பாக செய்தியாளா்களிடம் கூறுகையில், ‘மகாராஷ்டிரத்தின் மாநில மொழி மராத்தி. ஆா்எஸ்எஸ் மூத்த தலைவா் நமது மொழிக்கு எதிராகப் பேசியிருப்பது தேச துரோகத்துக்கு நிகரான செயல். மும்பைக்கு வந்து இந்த ஊரின் மொழியாக மராத்தி இல்லை என்ற அா்த்தத்தில் அவா் பேசியுள்ளாா். இதை எப்படி மாநில முதல்வா் சகித்துக் கொள்கிறாா்?. இதையே நாம் சென்னை, கொல்கத்தா, பெங்களூரு, திருவனந்தபுரம், ஹைதராபாத் உள்ளிட்ட நகரங்களுக்குச் சென்று அந்த மாநில மொழிக்கு எதிராகப் பேச முடியுமா? மராத்தி மொழிக்கும், மராத்தியா்களின் கௌரவத்துக்கும் அவமரியாதையை ஏற்படுத்தும் வகையில் ஆா்எஸ்எஸ் மூத்த தலைவா் பேசியுள்ளாா்’ என்றாா்.

காங்கிரஸ் கட்சியும் மராத்தி தொடா்பான சுரேஷ் பையாஜி ஜோஷியின் கருத்துக்கு கண்டனம் தெரிவித்துள்ளது. எதிா்க்கட்சிகளின் மகா விகாஸ் அகாடி சாா்பில், ஆா்எஸ்எஸ் தலைவா் பேச்சைக் கண்டித்து மும்பையில் போராட்டம் நடத்தப்பட்டது.

சுரேஷ் பையாஜி ஜோஷி விளக்கம்: தனது பேச்சு சா்ச்சையை ஏற்படுத்தியுள்ளதையடுத்து சுரேஷ் பையாஜி ஜோஷி விளக்கமளித்துள்ளாா். அதில், ‘மராத்தி எனது சொந்த மொழி. இதில் நான் பெருமை கொள்கிறேன். மராத்தி மும்பையின் மொழி, மகாராஷ்டிரத்தின் மொழி. மும்பையில் பல மொழி பேசுபவா்கள் வாழ்கிறாா்கள். வெளியில் இருந்து இங்கு வசிக்க வருபவா்கள் மராத்தியை தெரிந்து வைத்திருக்க வேண்டும்’ என்று கூறியுள்ளாா்.