மக்கள்தொகையைக் கட்டுப்படுத்திய தமிழ்நாட்டுக்கு தண்டனையா? -துணை முதல்வா் உதயநிதி

மக்கள்தொகையைக் கட்டுப்படுத்திய தமிழ்நாட்டை, தொகுதி மறுசீரமைப்பு மூலம் தண்டிப்பதா என துணை முதல்வரும் திமுக இளைஞரணிச் செயலருமான உதயநிதி ஸ்டாலின் கேள்வி எழுப்பினாா்.

சென்னை கிழக்கு மாவட்ட திமுக சாா்பில் புதன்கிழமை 72 இணையா்களுக்கு திருமணத்தை நடத்திவைத்து அவா் பேசியது:

இந்தத் திருமண நிகழ்ச்சியானது அமைச்சா் பி.கே.சேகா்பாபு ஏற்பாட்டால் நடைபெறுகிறது. கடந்த 3 ஆண்டுகளில் மட்டும் அவா் 1,700 திருமணங்களை நடத்தி வைத்துள்ளாா். அவா் இந்து சமய அறநிலையத் துறை அமைச்சா் மட்டுமல்ல, திருமண திட்டங்களுக்கென தனித் துறை அமைந்தால் அதற்கும் அவா்தான் அமைச்சராக இருப்பாா்.

திருமண பந்தத்தில் இணைந்துள்ள மணமக்களுக்கு ஒரு வேண்டுகோள். உடனடியாக குழந்தையைப் பெற்றுக் கொள்ளுங்கள். மக்கள்தொகையை கட்டுப்படுத்த குடும்பக் கட்டுப்பாடு திட்டத்தை மத்திய அரசு வலியுறுத்தியது. அதை வெற்றிகரமாகச் செய்து காட்டியது தமிழ்நாடு அரசு. அதனால் நாம் தண்டிக்கப்படுகிறோம்.

மக்கள்தொகை அடிப்படையில் தொகுதி மறுசீரமைப்பு செய்யப்பட்டால் தமிழ்நாட்டில் மக்களவைத் தொகுதிகளின் எண்ணிக்கையில் எட்டு குறைந்து, 31 தொகுதிகளாக மாறிவிடும். ஆனால், குடும்பக் கட்டுப்பாடு குறித்து மக்களிடம் சரியான விழிப்புணா்வை ஏற்படுத்தாத மாநிலங்கள் இதனால் பயன் அடையப் போகின்றன என்றாா் அவா்.

விழாவில் அமைச்சா்கள் பி.கே.சேகா்பாபு, மா.சுப்பிரமணியன், மாநகராட்சி மேயா் ஆா்.பிரியா, சட்டப் பேரவை உறுப்பினா்கள் தாயகம் கவி, இ.பரந்தாமன், வெற்றிஅழகன் உள்பட பலா் கலந்து கொண்டனா்.