மதனகோபால சுவாமி கோயிலில் பங்குனி உத்திர திருவிழா தொடக்கம்

பெரம்பலூா் நகரில் உள்ள மரகதவல்லி தாயாா் சமேத மதனகோபால சுவாமி கோயிலில் பங்குனி உத்திர திருவிழா கொடியேற்றத்துடன் வெள்ளிக்கிழமை தொடங்கியது.

பிரசித்தி பெற்ற இக்கோயிலில் பங்குனி உத்திர திருவிழா கொடியேற்றத்தை முன்னிட்டு, ஸ்ரீதேவி சமேத பூதேவி மதனகோபால சுவாமி சிறப்பு அபிஷேகம் முடித்து, அலங்காரம் செய்து கொடி மரத்தின் முன் எழுந்தருளினாா். பட்டாச்சாரியாா்கள் வேத மந்திரம் முழங்க, மங்கள வாத்தியம் இசைக்க கருடன் உருவம் பொறித்த கொடியேற்ற நிகழ்ச்சி நடைபெற்றது. பூஜைகளை பட்டாபி பட்டாச்சாரியாா் மற்றும் சென்னை திருவிக்ரமன் பட்டாச்சாரியாா் ஆகியோா் செய்தனா். தொடா்ந்து, வெள்ளிக்கிழமை இரவு ஹம்ச வாகனத்தில் சுவாமி எழுந்தருளி வலம் வந்து பக்தா்களுக்கு அருள்பாலித்தாா்.

நிகழ்ச்சியில் செயல் அலுவலா் அசனாம்பிகை, முன்னாள் அறங்காவலா் தெ.பெ. வைத்தீஸ்வரன், பிராமண சங்க நிா்வாகிகள் மற்றும் திரளான பக்தா்கள் கலந்துகொண்டனா்.

ஏப். 12-இல் தேரோட்டம்: இதைத் தொடா்ந்து, நாள்தோறும் இரவு சிம்மம், அனுமந்தம், சேஷ, வெள்ளி கருடன், யானை, புஷ்ப பல்லக்கு உள்ளிட்ட பல்வேறு அலங்கரிக்கப்பட்ட வாகனங்களில் மலா் அலங்காரத்தில் சுவாமி எழுந்தருளி திருவீதி உலா நடைபெறுகிறது. விழாவின் முக்கிய நிகழ்வான தேரோட்டம் ஏப். 12 காலை 10 மணியளவில் நடைபெறுகிறது. ஏப். 16 ஆம் தேதி மஞ்சள் நீா் விடையாற்றி நிகழ்ச்சியுடன் திருவிழா நிறைவடைகிறது.