சென்னை பெரம்பூரில் மதுபோதையில் ஏற்பட்ட தகராறில் தாக்கப்பட்டதில் இளைஞா் உயிரிழந்தாா்.
பெரம்பூா் மங்களபுரம் பகுதியைச் சோ்ந்த மணிகண்டன் (28), அவரது நண்பா்களான ஓட்டேரி கிருஷ்ணதாஸ் சாலைப் பகுதியைச் சோ்ந்த ஜெய்சங்கா் (26), ஐசக் ஜெயக்குமாா் (22) ஆகிய மூவரும் கடந்த 21-ஆம் தேதி பெரம்பூா் மங்களபுரம் சிஒய்எஸ் சாலைப் பகுதியிலுள்ள உணவகத்தின் அருகே மது அருந்தினா்.
மதுபோதையில் அவா்களுக்குள் வாக்குவாதம் முற்றவே ஜெய்சங்கரும், ஜெயக்குமாரும் இரும்பு கம்பியால் மணிகண்டனை தாக்கினா். இதில் பலத்த காயமடைந்த மணிகண்டன் மீட்கப்பட்டு, கீழ்ப்பாக்கம் அரசு மருத்துவமனையில் சிகிச்சைக்காக அனுமதிக்கப்பட்டாா்.
இது தொடா்பாக ஓட்டேரி போலீஸாா் வழக்குப் பதிந்து, ஜெய்சங்கா், ஜெயக்குமாரை கைது செய்தனா். இதற்கிடையே மருத்துவமனையில் அனுமதிக்கப்பட்டிருந்த மணிகண்டன், சிகிச்சைப் பலனின்றி புதன்கிழமை காலை உயிரிழந்தாா்.
இதையடுத்து ஜெய்சங்கா், ஜெயக்குமாா் மீது ஏற்கெனவே பதியப்பட்ட வழக்கு, கொலை வழக்காக மாற்றப்பட்டு விசாரணை நடைபெற்று வருகிறது.
