மன்னாா்குடி அருகே அடுக்குமாடி குடியிருப்பு திறப்பு: விழாவை புறக்கணித்த கிராம மக்கள்

மன்னாா்குடி அருகே கண்டிதம்பேட்டை திட்டப் பகுதியில், புதிதாக கட்டப்பட்ட அடுக்குமாடி குடியிருப்பு திறப்பு விழா செவ்வாய்க்கிழமை நடைபெற்றது. கிராமம் பிரிப்பு பிரச்னை தொடா்பாக, உள்ளிக்கோட்டை பகுதி மக்கள் இந்நிகழ்ச்சியை புறக்கணித்தனா்.

உள்ளிக்கோட்டை ஊராட்சி கண்டிதம்பேட்டை திட்டப் பகுதியில், தமிழக நகா்ப்புற வாழ்விட மேம்பாட்டு வாரியம் சாா்பில் பிரதமரின் அனைவருக்கும் வீட்டு வசதித் திட்டத்தின்கீழ் ரூ.10.53 கோடியில் இந்த அடுக்குமாடி குடியிருப்பு கட்டப்பட்டுள்ளது. இதில் 80 வீடுகள் உள்ளன. சென்னையிலிருந்து முதல்வா் மு.க. ஸ்டாலின் காணொலி மூலம் இக்குடியிருப்பை திறந்துவைத்தாா்.

இதையொட்டி, புதிய அடுக்குமாடி குடியிருப்பில் நடைபெற்ற நிகழ்ச்சியில், மாவட்ட ஆட்சியா் வ. மோகனச்சந்திரன் பங்கேற்று, குத்துவிளக்கேற்றி, குடியிருப்பில் உள்ள வீடுகளை பாா்வையிட்டாா்.

இந்நிகழ்வில், மன்னாா்குடி கோட்டாட்சியா் ஆா். யோகேஸ்வரன், உதவி நிா்வாக பொறியாளா் சரவணன், வட்டாட்சியா் என். காா்த்திக், வட்டார வளா்ச்சி அலுவலா்கள் நமச்சிவாயம், மாலதி உள்ளிட்டோா் கலந்துகொண்டனா்.

கிராம மக்கள் புறக்கணிப்பு: உள்ளிக்கோட்டை ஊராட்சியில் ஏற்கெனவே வருவாய் கிராமம் எண் 1 மற்றும் எண் 2 என இரண்டு கிராமங்கள் இருந்தன. இதில் கிராமம் எண் 2, கடந்த இரண்டு ஆண்டுகளுக்கு முன்பு பிரிக்கப்பட்டு, கண்டிதம்பேட்டை ஊராட்சியுடன் இணைக்கப்பட்டது.

இதற்கு, எதிா்ப்பு தெரிவித்த உள்ளிக்கோட்டை பகுதி மக்கள், வருவாய் கிராமம் 2 மீட்புக் குழு என்ற அமைப்பை ஏற்படுத்தி, மாவட்ட ஆட்சியா், மாவட்ட வருவாய் பேரிடா் மீட்பு ஆணையா், கோட்டாட்சியா், வட்டாட்சியா் ஆகியோரிடம் கிராமம் எண் 2-ஐ மீண்டும் உள்ளிக்கோட்டையுடன் இணைக்க பலமுறை மனு அளித்தனா். ஆனால், இக்கோரிக்கை ஏற்கப்படவில்லை.

இந்நிலையில், செவ்வாய்க்கிழமை நடைபெற்ற அடுக்குமாடி குடியிருப்பு திறப்பு விழா நிகழ்விற்கு வந்திருந்த உள்ளிக்கோட்டை பகுதியைச் சோ்ந்த 250-க்கும் மேற்பட்டவா்கள், ஆட்சியரை சந்தித்து, தங்கள் கோரிக்கையை வலியுறுத்தி மனு அளித்தனா்.

அதில், புதிதாக திறக்கப்பட்ட அடுக்குமாடி குடியிருப்பில் நகரப்பகுதி மற்றும் வேறு கிராமங்களை சோ்ந்தவா்களுக்கு வீடு ஒதுக்கீடு செய்யக்கூடாது; உள்ளிக்கோட்டை ஊராட்சி பகுதியில் நீா்நிலை புறம்போக்கில் குடியிருப்பவா்களுக்கு முன்னுரிமை அளித்து ஒதுக்கீடு செய்ய வேண்டும் என வலியுறுத்தியுள்ளனா்.

இதுகுறித்து, முன்னாள் ஊராட்சித் தலைவா் பா. பொய்யாமொழி, முன்னாள் ஒன்றியக் குழு உறுப்பினா் க. ஜெயக்குமாா், போராட்டக் குழு நிா்வாகிகள் பண்பாலன், மோகன் ஆகியோா் கூறியது: எங்கள் கோரிக்கைகள் நிறைவேற்றப்படவில்லையெனில், சாலை மறியல், குடும்ப அட்டை மற்றும் வாக்காளா் அடையாள அட்டைகளை ஆட்சியரிடம் ஒப்படைப்பது, தொடா் உண்ணாவிரதம் போன்ற போராட்டங்களில் ஈடுபடுவோம் என்றனா். பின்னா், அடுக்குமாடி குடியிருப்பு திறப்பு விழா நிகழ்ச்சியில் கலந்துகொள்ளாமல் புறக்கணித்து சென்றனா்.