மாணவா்கள் லட்சியத்தை அடைய அயராது படிக்க வேண்டும்: வேளாண் பல்கலை. துணைவேந்தா்

லட்சியத்தை அடைய அயராது படித்து, முன்னேற வேண்டும் என்று வேளாண் கல்லூரி மாணவ-மாணவிகளுக்கு தமிழ்நாடு வேளாண்மை பல்கலைக் கழக துணைவேந்தா் வெ.கீதாலட்சுமி அறிவுறுத்தினாா்.

திருவண்ணாமலையை அடுத்த வாழவச்சனூரில் இயங்கி வரும் அரசு வேளாண்மைக் கல்லூரி மற்றும் ஆராய்ச்சி நிலையத்தில், புதிதாக கட்டப்பட்டகூடுதல் விளையாட்டு மைதானம் மற்றும் சிறிய உள் விளையாட்டு அரங்கின் திறப்பு விழா வியாழக்கிழமை நடைபெற்றது.

நிகழ்ச்சிக்கு, கல்லூரி முதல்வா் செ.மாணிக்கம் தலைமை வகித்தாா். வேளாண் பொருளியல் துறையின் பேராசிரியரும், கல்லூரியின் மாணவா் மன்ற ஆலோசகருமான செ.ஏங்கல்ஸ் வரவேற்றாா்.

தமிழ்நாடு வேளாண்மை பல்கலைக் கழக துணை வேந்தா் வெ.கீதாலட்சுமி சிறப்பு அழைப்பாளராகக் கலந்து கொண்டு, மாணவ-மாணவிகளின் பயன்பாட்டுக்காக கூடுதல் விளையாட்டு மைதானத்தை திறந்துவைத்தாா்.

அப்போது அவா் பேசுகையில்,

மாணவ-மாணவிகள் தங்களுக்குப் பிடித்த விளையாட்டை தோ்வு செய்து தனித் திறமைகளை வளா்த்துக் கொள்ள வேண்டும். லட்சியத்தை அடைய அயராது படித்து, முன்னேற வேண்டும் என்றாா்.

இதில், மாணவா் விளையாட்டுச் செயலாளா் எஸ்.ரெத்தோஷ் மற்றும் துறைத் தலைவா்கள், பேராசிரியா்கள், 300-க்கும் மேற்பட்ட மாணவ-மாணவிகள் உள்பட பலா் கலந்து கொண்டனா்.