முன்னாள் படைவீரா்களுக்கான விழிப்புணா்வுக் கூட்டம்

மயிலாடுதுறையில் முன்னாள் படைவீரா்கள் மற்றும் அவா்களைச் சாா்ந்தோா்களுக்கு முதல்வரின் காக்கும் கரங்கள் திட்டம் குறித்த விழிப்புணா்வுக் கூட்டம் வியாழக்கிழமை நடைபெற்றது.

மாவட்ட ஆட்சியா் அலுவலகக் கூட்டரங்கில் நடைபெற்ற கூட்டத்துக்கு, ஆட்சியா் ஹெச்.எஸ்.ஸ்ரீகாந்த் தலைமை வகித்துப் பேசியது:

தமிழக அரசு முன்னாள் படைவீரா்களின் நலனுக்காக ‘முதல்வரின் காக்கும் கரங்கள்‘ என்ற புதிய திட்டத்தை அறிவித்தது. இத்திட்டத்தின்படி முன்னாள் படைவீரா்கள் தொழில் தொடங்க ரூ. 1 கோடி வரை வங்கிகள் மூலம் கடன் பெறுவதற்கு வழிவகை செய்யப்பட்டுள்ளது.

இத்திட்டத்தின் மூலம் தொடங்கப்படும் தொழில்களுக்கு வழங்கப்படும் கடன் தொகையில், 30 விழுக்காடு மூலதன மானியமும், 3 விழுக்காடு வட்டி மானியமும் வழங்கப்படும். இவா்களுக்குத் திறன் மற்றும் தொழில் முனைவோா் மேம்பாட்டுப் பயிற்சி போன்ற தேவையான பயிற்சிகளும் அரசால் வழங்கப்படும். ராணுவப் பணியின்போது உயிரிழந்த படைவீரா்களின் கைம்பெண்களும் இத்திட்டத்தின் மூலம் பயன்பெறலாம்.

எனவே, சுயதொழில் செய்ய விரும்பும் முன்னாள் படைவீரா்கள் மற்றும் படைப்பணியின்போது மரணமடைந்த படைவீரா்களின் கைம்பெண்கள் தங்களது விருப்பத்தினை விண்ணப்பத்தின் மூலமாக நாகப்பட்டினம் மாவட்ட முன்னாள் படைவீரா் நல உதவி இயக்குநா் அலுவலகத்திற்கு அனுப்பிடுமாறும், கூடுதல் விவரங்களுக்கு நாகப்பட்டினம் மாவட்ட முன்னாள் படைவீரா் நல அலுவலக தொலைபேசியில் (எண்.04365-299765) தொடா்பு கொள்ளுமாறும் தெரிவித்தாா்.

உதவி இயக்குநா் (முன்னாள் படைவீரா்கள்) ராகவேந்திரன், முன்னோடி வங்கி அதிகாரி லெட்சுமிபதி ஆகியோா் கலந்து கொண்டனா்.