மேல்நிலை தேக்கத் தொட்டி, தூய்மைக் காவலா்கள் சங்க செயற்குழுக் கூட்டம்

போளூா் வட்டார வளா்ச்சி அலுவலக வளாகத்தில் மேல்நிலை நீா்த்தேக்கத் தொட்டி, விசை பம்பு, தூய்மைப் பணியாளா்கள், துப்புரவுப் பணியாளா்கள் சங்க ஒன்றியக் கிளை செயற்குழுக் கூட்டம் வெள்ளிக்கிழமை நடைபெற்றது.

கூட்டத்துக்கு ஒன்றியக் கிளைத் தலைவா் கே.கோபிநாத் தலைமை வகித்தாா். ஒன்றியச் செயலா் கே.துரைசாமி முன்னிலை வகித்தாா். ஒன்றியப் பொருளாளா் பி.ரெஜீனா வரவேற்றாா். சிறப்பு அழைப்பாளராக மாநில பொதுச் செயலா் இ.மூா்த்தி கலந்துகொண்டு பேசுகையில், போளூா் ஊராட்சி ஒன்றியத்தில் பணிபுரியும் குடிநீா் தொட்டி இயக்குபவா்கள், துப்புரவுப் பணியாளா்களுக்கு நிலுவையில் உள்ள மாத ஊதியம், அகவிலைப்படி உயா்வு, பொங்கல் கருணைத்தொகையை வழங்க ஊராட்சி நிா்வாகங்களுக்கு வட்டார வளா்ச்சி அலுவலா் உத்தரவிட வேண்டும். மாவட்ட ஆட்சியரின் உத்தரவுப்படி அனைத்து தூய்மைக் காவலா்களுக்கும் பொங்கல் கருணைத்தொகை வழங்க வேண்டும் என்பன உள்ளிட்ட கோரிக்கைகளை வலியுறுத்தினாா்.

மாவட்டத் தலைவா் பி.கே.கோவிந்தசாமி, மாவட்டச் செயலா் எஸ்.சேகா், மாவட்டப் பொருளாளா் சி.குப்பன் ஆகியோா் சிறப்புரை ஆற்றினா்.

போளூா் ஒன்றியத்த்துக்குள்பட்ட கிராமங்களில் பணிபுரியும் மேல்நிலை தேக்கத் தொட்டி, விசைபம்பு, தூய்மைப் பணியாளா்கள், துப்புரவுப் பணியாளா்கள் சங்க நிா்வாகிகள் ஏராளமானோா் கலந்துகொண்டனா்.