யமுனை அழகுபடுத்தும் திட்டம்: உஸ்மான்புரியில் ஆக்கிரமிப்பு குடியிருப்புகள் அகற்றம்

யமுனை அழகுபடுத்தும் திட்டம் காரணமாக தில்லி ஷாஹ்தாரா பகுதியில் உள்ள உஸ்மான்புரியில் சட்டவிரோத ஆக்கிரமிப்புகளை அகற்றும் பணி செவ்வாய்க்கிழமை தொடங்கியது.

ஆக்கிரமிப்பு பணிகளையொட்டி பலத்த காவல் துறை பாதுகாப்பு ஏற்பாடு செய்யப்பட்டுள்ளதாக தில்லி காவல் துறையின் மூத்த அதிகாரி ஒருவா் தெரிவித்தாா்.

இது குறித்து அவா் கூறுகையில், ‘1,500-க்கும் அதிகமான காவல் துறையினா், துணை ராணுவப் படையினா் பாதுகாப்புப் பணியில் ஈடுபட்டுள்ளன. யாரும் சட்டம்-ஒழுங்கை மீற அனுமதிக்கப்படமாட்டாா்கள்’ என்றாா்.

பழைய இரும்பு பாலம் அருகே வசித்து வரும் குடியிருப்பாளா்கள் திங்கள்கிழமைக்குள் அப்பகுதியிலிருந்து வெளியேறுமாறு அதிகாரிகள் சனிக்கிழமை நோட்டீஸ் வழங்கினா்.

இந்நிலையில், யமுனை அழகுபடுத்தும் திட்டத்தின் ஒரு பகுதியாக ஆக்கிரமிப்பு அகற்றும் பணி செவ்வாய்க்கிழமை தொடங்கியது. இந்தப் பணி புதன்கிழமை தொடரும் என கூறப்படுகிறது.

இதனிடையே, தங்களுக்கு மாற்று இடத்தை அரசு வழங்க வேண்டும் என அப்பகுதியில் வசித்து வந்த மக்கள் அரசுக்கு கோரிக்கை விடுத்துள்ளனா்.

இது தொடா்பாக பிங்கி காஷ்யப் செய்தியாளா்களிடம் கூறுகையில், ‘குழந்தைகளுடன் இந்த நிலையில் இங்கு செல்ல முடியும் ? வீடோ அல்லது ஓா் அறையோ வாங்குவதற்கு எங்களிடம் பணம் இல்லை. என்னுடைய கணவா் மாதம் ரூ.12,000 மட்டும் வருவாய் ஈட்டுகிறாா். தில்லி போன்ற நகரத்தில் பிற செலவுகளுடன் வாடகை இடத்தில் தங்கியிருப்பது மிகவும் கடினம்’ என்றாா்.