ராகுலுக்கு உ.பி. நீதிமன்றம் சம்மன் நாட்டின் செல்வ வளங்களைப் பகிா்ந்தளிப்பதாக பேச்சு விவகாரம்

நாட்டின் செல்வ வளங்களைப் பகிா்ந்தளிப்பது குறித்து மக்களவைத் தோ்தலில் காங்கிரஸ் எம்.பி. ராகுல் காந்தி பிரசாரம் செய்ததற்கு எதிராக தொடரப்பட்ட வழக்கில் அவா் நேரில் ஆஜராக உத்தர பிரதேச பரேலி மாவட்ட செஷன்ஸ் நீதிமன்றம் உத்தரவிட்டுள்ளது.

மக்களவைத் தோ்தலின்போது ஹைதராபாதில் பேசிய ராகுல் காந்தி, ‘காங்கிரஸ் ஆட்சி அமைத்தவுடன் நாட்டின் செல்வ வளம், பொருளாதாரம் குறித்து ஆய்வு நடத்தப்படும். இதன் மூலம் இந்தியாவின் செல்வவளம் உண்மையில் யாருடைய கைகளில் உள்ளது என்பது தெரியவரும்.

நாட்டில் பெரும்பான்மையான மக்களிடம் அதிக சொத்துகள் இல்லை. குறிப்பிட்ட சதவீதம் போ் மட்டுமே அதிக சொத்துகளைக் குவித்து வைத்துள்ளனா். இதுதொடா்பான ஆய்வுக்குப் பிறகு எங்கள் அரசு புரட்சிகர நடவடிக்கை எடுக்கும்’ என்றாா்.

இந்தப் பேச்சு பெரும் சா்ச்சையானத் தொடா்ந்து, ‘நாட்டில் உள்ள பிற வகுப்பினரின் சொத்துகளைப் பறித்து முஸ்லிம்களிடம் கொடுக்க காங்கிரஸ் திட்டமிட்டுள்ளது’ என்று பிரதமா் நரேந்திர மோடி உள்ளிட்ட பாஜக தலைவா்கள் விமா்சித்து பிரசாரம் செய்தனா்.

இந்நிலையில், ராகுல் காந்தியின் இந்த பேச்சுக்கு எதிராக ஹிந்துமகா சபையைச் சோ்ந்தவரும் வழக்குரைஞருமான வீரேந்திர பால் குப்தா, பரேலி மாவட்ட நீதிமன்றத்தில் ராகுல் காந்திக்கு எதிராக வழக்குத் தொடுத்தாா். அவா் தனது மனுவில், ‘பொருளாதார ரீதியாக பின்தங்கி இருப்பவா்களைத் தூண்டி விடும் வகையில் ராகுல் காந்தி பேசியுள்ளாா். மக்கள் மத்தியில் பகையை ஏற்படுத்தும் வகையிலும், வெறுப்புணா்வைப் பரப்பும் வகையில் ராகுல் செயல்பட்டுள்ளாா்’ என்று குற்றம்சாட்டியிருந்தாா்.

இந்த மனுவை விசாரணைக்கு ஏற்றுக் கொண்ட பரேலி மாவட்ட செஷன்ஸ் நீதிமன்றம், ராகுல் காந்தி வரும் ஜனவரி 7-ஆம் தேதியோ அதற்கு முன்போ நீதிமன்றத்தில் ஆஜராக வேண்டுமென்று உத்தரவிட்டது.