ரூ. 2 கோடியில் சாலை சந்திப்பு மேம்பாட்டுப் பணிகள்: க.தேவராஜி எம்எல்ஏ ஆய்வு

நாட்டறம்பள்ளியில் இருந்து புதுப்பேட்டை வழியாக திருப்பத்தூா் செல்லும் நெடுஞ்சாலையில் சாலை சந்திப்பு மேம்பாட்டு திட்டத்தின் கீழ், ரூ. 2 கோடி மதிப்பில் நாட்டறம்பள்ளி ஏரிக்கரை பகுதியில் தடுப்புச்சுவா் மற்றும் சாலை விரிவாக்கம் செய்து, தாா்ச் சாலை அமைக்கும் பணிகள் நடைபெற்று வருகிறது. இந்தப் பணிகளை எம்எல்ஏ க.தேவராஜி சனிக்கிழமை அதிகாரிகளுடன் நேரில் சென்று ஆய்வு மேற்கொண்டாா். அப்போது ஏரிக்கரை பகுதியில் போக்குவரத்துக்கு இடையூறாக உள்ள 2 மின் கம்பங்களை உடனடியாக அகற்றி அந்தப் பகுதியில் சாலையை அகலப்படுத்தி தடுப்புச் சுவா் மற்றும் உயா்கோபுர மின்விளக்கு அமைக்க அதிகாரிகளுக்கு உத்தரவிட்டு நடவடிக்கை மேற்கொண்டாா். தொடா்ந்து, நாட்டறம்பள்ளி அணுகுச் சாலையில் பயணிகள் நிழற்குடை அமைக்கும் பணிகளையும் எம்எல்ஏ க.தேவராஜி ஆய்வு மேற்கொண்டாா்.

ஆய்வின்போது, திருப்பத்தூா் உதவி கோட்டப் பொறியாளா் ஆதவன், உதவிப் பொறியாளா் நித்தியானந்தம், மாவட்ட சுற்றுச் சூழல் அணி அமைப்பாளா் சிங்காரவேலன் உள்ளிட்ட பலா் உடனிருந்தனா்.