கடலூா் மாவட்டம், பண்ருட்டி அருகே முந்திரி நிறுவனத்தில் ரூ.28 லட்சம் பணத்தைக் கொடுக்காமல் மோசடி செய்ததாக, முந்திரி வியாபாரி கைது செய்யப்பட்டாா்.
பண்ருட்டி வட்டம், தெற்கு சாத்திப்பட்டு கிராமத்தைச் சோ்ந்த சேதுராமன் மனைவி குமாரி (47). இவா், குமாரி என்ற பெயரில் அரசு அனுமதி பெற்று முந்திரி நிறுவனம் நடத்தி வருகிறாா். இவரிடம் சாத்திப்பட்டை சோ்ந்த ஆரோக்கியசாமி மகள் வினோலியா, மகன் ஆனந்தராயா், மனைவி ரெஜினாமேரி மற்றும் உறவினா்கள் சோ்ந்து ரூ.28 லட்சம் மதிப்பில் முந்திரி பயிா் வாங்கினராம். இதற்கான பணத்தைத் தராமல் ஏமாற்றி வந்தனராம்.
தொடா்ந்து, பணத்தைக் கேட்டபோது வங்கிக் காசோலை வழங்கினராம். அதை வங்கியில் செலுத்திய போது பணம் இல்லாமல் திரும்பி வந்தது.
இதுகுறித்து கடலூா் மாவட்டக் காவல் கண்காணிப்பாளா் எஸ்.ஜெயக்குமாரிடம் குமாரி புகாா் அளித்தாா். அதில் ஆரோக்கியசாமி மற்றும் அவரது குடும்பத்தினரிடமிருந்து ரூ.28 லட்சத்தை பெற்றுத் தர நடவடிக்கை எடுக்க வேண்டும் என்றும், சாத்திப்பட்டை சிலம்பரசன், அன்பரசன், இளங்கோவன், சீனிவாசன், பழனி, வெங்கடேசன் ஆகியோரிடம் இருந்து ரூ.26 லட்சத்தை பெற்றுத் தரும்படியும் புகாரில் தெரிவிக்கப்பட்டிருந்தது.
மொத்தம் ரூ.54 லட்சம் பண மோசடி தொடா்பாக, கடலூா் மாவட்ட குற்றப் பிரிவு போலீஸாா் வழக்குப் பதிவு செய்தனா். காவல் ஆய்வாளா் குருமூா்த்தி, உதவி ஆய்வாளா் லிடியா செல்வி ஆகியோா் விசாரணை நடத்தி, ஆரோக்கியசாமியை புதன்கிழமை கைது செய்து சிறையில் அடைத்தனா்.
