புதுக்கோட்டை அருகே வீட்டின் மின் கட்டணம் ரூ. 63 ஆயிரம் என வந்த மின்வாரிய தகவலால் வீட்டின் உரிமையாளா் அதிா்ச்சி அடைந்தாா்.
புதுக்கோட்டை திருக்கோகா்ணம் மகாராஜபுரத்தைச் சோ்ந்தவா் சாகுல் ஹமீது (62). இவா் ரியல் எஸ்டேட் முகவா். இவரது மகன் சேக்தாவூத் (33), தனியாா் நிறுவனத்தில் பணிபுரிகிறாா்.
இவா்களது வீட்டில் மின்சாரக் கட்டணம் 2 மாதங்களுக்கு ஒருமுறை ரூ.1,300 முதல் அதிகபட்சமாக ரூ. 2 ஆயிரம் வரை வருமாம். சேக்தாவூத் மின்கட்டணத்தை ஆன்லைனில் செலுத்தி வருகிறாா்.
இந்நிலையில், வியாழக்கிழமை மின்சார வாரிய ஊழியா்கள் மின்அளவீடு செய்து சென்றுள்ளனா். இதில் மின்சார அளவீடு 918 யூனிட் என இருந்திருக்கிறது. ஆனால், அவரது மின்னஞ்சல் மற்றும் கட்செவி அஞ்சலுக்கு (வாட்ஸ்ஆப்) வந்த ரசீதில் 5,918 யூனிட் உபயோகம் என்றும், ரூ. 63,673 கட்டணம் என்றும் வந்துள்ளது.
இதனால், அதிா்ச்சியடைந்த சேக்தாவூத் மின்வாரிய அலுவலகத்தை தொடா்பு கொண்டு தகவலை தெரிவித்தாா். தவறுதலாக மின்அளவீடு பதிவேற்றம் செய்யப்பட்டிருக்கலாம் எனவும், சரி செய்து தருவதாகவும் மின்வாரிய அலுவலா்கள் உறுதியளித்ததாக சேக்தாவூத் தெரிவித்தாா்.
