இலுப்பூா் புனித பதுவை அந்தோணியாா் ஆலய தோ்பவனி

இலுப்பூரில் புனித பதுவை அந்தோணியாா் ஆலய தோ்பவனி வியாழக்கிழமை இரவு தொடங்கி வெள்ளிக்கிழமை அதிகாலை வரை நடைபெற்றது.

இந்த ஆலயத்தின் பெருவிழா கடந்த 4-ஆம் தேதி கொடியேற்றத்துடன் தொடங்கியது.

விழாவில், நாள்தோறும் திவ்ய நற்கருணை ஆசீா், மறையுரை, செபமாலை, திருப்பலி ஆகியவை நடைபெற்று வந்தன.

விழாவின் முக்கிய நிகழ்வான திருத்தோ் பவனி(சப்பரம்) வியாழக்கிழமை இரவு தொடங்கி வெள்ளிக்கிழமை அதிகாலை வரை விடிய விடிய நடைபெற்றது.

முக்கிய வீதிகளில் வலம் வந்த முதல்தேரில் மைக்கேல் சம்மனசு, இரண்டாவது தேரில் அன்னை மாதா, மூன்றாவது தேரில் புனித பதுவை அந்தோணியாா் வலம் வந்தனா்.

முன்னதாக, இறை வாா்த்தையை வாழ்வாக்குவோம் என்ற தலைப்பில் மறையுரை கருத்துகளை வழங்கி பக்தா்களுக்காக ஜெபிக்கப்பட்டது. தொடா்ந்து, திண்டுக்கல் மறை மாவட்ட வேந்தா் தாமஸ் ஜான் பீட்டா், ஜான்போஸ்கோ அடிகளாா் திருத்தேரை புனிதம் செய்வித்தனா்.

இதையடுத்து, இறை புகழ்ச்சி பாடல்கள், வாணவேடிக்கை நிகழ்த்தப்பட்டு மின் விளக்குகளால் அலங்கரிக்கப்பட்ட புனிதா் தோ் பவனி நடைபெற்றது. வீதிகளில் தோ் வந்தபோது, புனிதா்களுக்கு பொதுமக்கள் மாலை அணிவித்து, தூபம் காண்பித்து, மெழுகுவா்த்தி ஏந்தி தங்களது வேண்டுதல்களை நிறைவேற்றினா்.

சனிக்கிழமை காலை 8 மணிக்கு திருவிழா திருப்பலி நடைபெறுகிறது. அருட்பணி வினோத் திருப்பலி நிறைவேற்றுகிறாா். தொடா்ந்து, இரவு 7 மணி அளவில் திவ்ய நற்கருணை ஆசிா்வாதமும் பின்னா் கொடி இறக்கமும் நடைபெறுகிறது. தொடா்ந்து இரவு 10 மணி அளவில் இன்னிசை கச்சேரி நடைபெற உள்ளது.

விழா ஏற்பாடுகளை இலுப்பூா் பங்குத் தந்தை யூஜின், அருட்சகோதரிகள், முக்கியஸ்தா்கள், இளைஞா்கள் செய்திருந்தனா்.