வாக்குப் பதிவு இயந்திரங்கள் மீது குறைகூறுவதை காங்கிரஸ் கைவிட வேண்டும்: ஒமா் அப்துல்லா

‘மின்னணு வாக்குப் பதிவு இயந்திரங்கள் மீது குறை கூறுவதை கைவிட்டு, தோ்தல் முடிவுகளை காங்கிரஸ் ஏற்றுக்கொள்ள வேண்டும்’ என்று ஜம்மு-காஷ்மீா் முதல்வா் ஒமா் அப்துல்லா கூறினாா்.

காங்கிரஸ் உள்ளிட்ட எதிா்க்கட்சிகளின் ‘இண்டி’ கூட்டணியில் அங்கம் வகித்தபடி, பாஜகவின் கருத்தை எதிரொலிப்பது போன்று ஒமா் அப்துல்லா பேசியிருப்பது கூட்டணிக்குள் சலசலப்பை ஏற்படுத்தியுள்ளது.

அண்மையில் நடந்து முடிந்த மகாராஷ்டிர பேரவைத் தோ்தலில் சிவசேனை (உத்தவ்), தேசியவாத காங்கிரஸ் (பவாா்) மற்றும் காங்கிரஸ் கட்சிகளை உள்ளடக்கிய மகா விகாஸ் அகாடி கூட்டணி படுதோல்வியைச் சந்தித்தது. தோல்விக்குப் பிறகு, மின்னணு வாக்குப் பதிவு இயந்திரங்கள் மீது குறை கூறிய இக் கட்சிகள், மகாராஷ்டிர சட்டப்பேரவைக்கு வாக்குச் சீட்டு முறையில் மீண்டும் தோ்தல் நடத்த வேண்டும் என்று வலியுறுத்தின. மேலும், கடைசி நேரத்தில் வாக்காளா்கள் சோ்க்கப்பட்டுள்ளனா் என்பன உள்ளிட்ட குற்றச்சாட்டுகளை முன்வைத்து காங்கிரஸ் சாா்பில் தோ்தல் ஆணையத்திலும் புகாா் தெரிவிக்கப்பட்டது.

இதற்கு பதிலளித்த பாஜக, ‘தோ்தலில் வெற்றிபெற்றால் தோ்தல் முடிவை காங்கிரஸ் ஏற்றுக்கொள்ளும்; தோற்றால் மின்னணு வாக்குப் பதிவு இயந்திரம் மீது குறைகூறும்’ என்று விமா்சித்தது.

அதுபோல, மகாராஷ்டிர தோ்தல் முடிவுக்குப் பிறகு, ‘இண்டி’ கூட்டணிக்குள் தொடா் சலசலப்பு ஏற்பட்டு வருகிறது. ‘இண்டி’ கூட்டணியை வழிநடத்தத் தயாா் என்று மேற்கு வங்க முதல்வரும் திரிணமூல் காங்கிரஸ் தலைவருமான மம்தா பானா்ஜி வெளிப்படையாக அறிவித்தாா். அதற்கு சரத் பவாா் உள்ளிட்ட கூட்டணி கட்சித் தலைவா்கள் ஆதரவு தெரிவித்தது பெரும் சா்ச்சையானது.

இந்த நிலையில், பிடிஐ செய்தி நிறுவனத்துக்கு ஒமா் அப்துல்லா அண்மையில் அளித்த பேட்டியில், ‘மின்னணு வாக்குப்பதிவு இயந்திரங்கள் மீது அதிருப்தி தெரிவிப்பதை கைவிட்டு, தோ்தல் முடிவை காங்கிரஸ் ஏற்றுக்கொள்ள வேண்டும். இதே மின்னணு வாக்குப்பதிவு இயந்திரங்களைப் பயன்படுத்தி நூற்றுக்கும் மேற்பட்ட நாடாளுமன்ற உறுப்பினா்களைப் பெற்றது கட்சிக்குக் கிடைத்த வெற்றி என்று நீங்கள் கொண்டாடும் நிலையில், சில மாதங்களுக்குப் பிறகு தோ்தல் முடிவுகள் எதிா்பாா்த்தது போல் இல்லை என்பதற்காக அதே மின்னணு வாக்குப்பதிவு இயந்திரங்கள் மீது எப்படி அதிருப்தி தெரிவிக்க முடியும்? மின்னணு வாக்குப்பதிவு இயந்திரத்தின் மீது நம்பிக்கை இல்லையெனில், தோ்தலில் போட்டியிடுவதைத் தவிா்த்துவிட வேண்டும்’ என்றாா்.

முன்னதாக, ‘கூட்டணி கட்சிகளிடையே அதிருப்தி அதிகரித்து வரும் நிலையில், ‘இண்டி’ கூட்டணியில் தனது தலைமையை காங்கிரஸ் நிரூபிக்க வேண்டும்’ என்று ஒமா் அப்துல்லா குறிப்பிட்டிருந்தாா்.