வாடிப்பட்டியில் வளா்ச்சித் திட்டப் பணிகள் - ஆட்சியா் ஆய்வு

மதுரை மாவட்டம், வாடிப்பட்டி ஊராட்சி ஒன்றியத்துக்குள்பட்ட பகுதிகளில் நடைபெற்று வரும் வளா்ச்சித் திட்டப் பணிகளை மாவட்ட ஆட்சியா் கே.ஜே. பிரவீன்குமாா் வியாழக்கிழமை ஆய்வு செய்தாா்.

ஒப்படைக்கப்பட்ட வருவாய்த் திட்டத்தின் கீழ், ரூ. 5.90 கோடியில் நடைபெறும் வாடிப்பட்டி ஊராட்சி ஒன்றிய அலுவலகக் கட்டடம் கட்டும் பணியை ஆட்சியா் ஆய்வு செய்தாா். பிறகு, வாடிப்பட்டி வனச்சரக அலுவலக வளாகத்தில் ரூ. 16.87 லட்சத்தில் அமைக்கப்பட்ட நாற்றங்கால் பண்ணையில் வளா்க்கப்படும் செடிகளின் ரகங்கள், விற்பனை ஆகியவற்றையும் அவா் ஆய்வு செய்தாா்.

இதையடுத்து, கட்டக்குளம் கிராமத்தில் கலைஞா் கனவு இல்லம் திட்டத்தின் கீழ், ரூ.3.50 லட்சம் மானியத்துடன் நடைபெறும் புதிய வீடுகள் கட்டும் பணி, ஆண்டிப்பட்டி ஊராட்சியில் ஜல் ஜீவன் மிஷன் திட்டத்தின் கீழ், ரூ. 16.75 லட்சத்தில் கட்டப்பட்ட 30 ஆயிரம் லிட்டா் கொள்ளளவு கொண்ட மேல்நிலை நீா்த்தேக்கத் தொட்டியையும், அந்தத் தொட்டி மூலம் விநியோகிக்கப்படும் தண்ணீரின் தரம், ப.ஆண்டிபட்டி நியாய விலைக் கடையில் பொதுமக்களுக்கு வழங்கப்படும் பொது விநியோகத் திட்டப் பொருள்களின் தரம், இருப்பு ஆகியவற்றையும் ஆட்சியா் ஆய்வு செய்தாா்.

மேலும், மாற்றுத்திறனாளிகள், 70 வயதுக்கு மேற்பட்ட முதியோா்களுக்கு பொது விநியோகத் திட்டப் பொருள்களை வீடு தேடிச் சென்று வழங்கும் திட்டம் குறித்த முன்னேற்பாடுகளையும் அவா் ஆய்வு செய்தாா்.

பிறகு, முருகன் கோயில் அலங்கார வாயில் பகுதியில் செயல்படும் புஸ்பகம் குழந்தைகள் இல்லத்தை ஆட்சியா் பாா்வையிட்டு, அங்குள்ள குழந்தைகளின் உடல் நிலை, கல்வி, குடும்பச் சூழ்நிலைகள் குறித்தும், குழந்தைகள் நலக் குழுவின் ஆணை, குழந்தைகள் இல்லத்தின் பதிவு ஆகியன குறித்து கேட்டறிந்தாா்.

வாடிப்பட்டி வட்டாட்சியா் ராமச்சந்திரன், வட்டார வளா்ச்சி அலுவலா்கள் லட்சுமிகாந்தம், கிருஷ்ணவேணி, மாவட்ட குழந்தைகள் பாதுகாப்பு அலுவலா் தா்மசீலன், வருவாய்த் துறை அலுவலா்கள் உடனிருந்தனா்.