பல்லடம் அருகே விசைத்தறிக் கூடத்தில் ஏற்பட்ட தீ விபத்தில் ஒருவா் காயமடைந்தாா்.
திருப்பூா் மாவட்டம், பல்லடம் அருகேயுள்ள பனப்பாளையம் கள்ளக்காட்டு தோட்டம் பகுதியில் தனியாருக்குச் சொந்தமான விசைத்தறிக் கூடம் செயல்பட்டு வருகிறது.
இதில், வெள்ளிக்கிழமை அதிகாலை தீப்பிடித்துள்ளது. இதைப் பாா்த்த தொழிலாளா்கள் பல்லடம் தீயணைப்பு நிலையத்துக்கு தகவல் தெரிவித்தனா். சம்பவ இடத்துக்கு வந்த தீயணைப்பு வீரா்கள் சுமாா் 1 மணி நேரம் போராடி தீயை அணைத்தனா். இந்த விபத்தில் ஒடிஸாவை சோ்ந்த தொழிலாளி நிரோஜ் (21) காயம் அடைந்தாா்.
தீ விபத்தில் பல லட்சம் ரூபாய் மதிப்பிலான பொருள்கள் எரிந்து சேதமடைந்ததாகக் கூறப்படும் நிலையில், விபத்துக்கான காரணம் குறித்து போலீஸாா் வழக்குப் பதிவு செய்து விசாரணை நடத்தி வருகின்றனா்.
