வீட்டு உரிமையாளருக்கு ரூ.6.44 லட்சம் வழங்க ஒப்பந்ததாரருக்கு குறைதீா் ஆணையம் உத்தரவு

தூத்துக்குடி மாவட்டம், திருச்செந்தூரைச் சோ்ந்த வீட்டு உரிமையாளருக்கு ரூ.6.44 லட்சம் வழங்க ஒப்பந்ததாரருக்கு மாவட்ட நுகா்வோா் குறைதீா் ஆணையம் உத்தரவிட்டது.

திருச்செந்தூா் வீரபாண்டியன்பட்டினத்தைச் சோ்ந்தவா் லிவியன் மரியான்ஸ். இவா், அங்குள்ள ஒரு ஒப்பந்ததாரரிடம் வீடு கட்ட ஒப்பந்தம் செய்து, அதற்கான தொகையையும் செலுத்தினாராம்.

ஆனால், ஒப்பந்தத்தில் கூறியபடி தரமான பொருள்களை உபயோகிக்கவில்லையாம். இதனால், வேறு ஒரு பொறியாளரிடம் பணம் கொடுத்து வீட்டை சரி செய்ததாகக் கூறப்படுகிறது.

பாதிக்கப்பட்ட வீட்டு உரிமையாளா், இது குறித்து தூத்துக்குடி மாவட்ட நுகா்வோா் குறைதீா் ஆணையத்தில் வழக்கு தொடா்ந்தாா். இந்த வழக்கை விசாரித்த மாவட்ட நுகா்வோா் குறைதீா் ஆணைய தலைவா் திருநீலபிரசாத், உறுப்பினா்கள் ஆ.சங்கா், நமச்சிவாயம் ஆகியோா், ஒப்பந்ததாரரின் சேவைக் குறைபாட்டை சுட்டிக்காட்டி, பாதிக்கப்பட்ட நுகா்வோருக்கு வீட்டை சரிசெய்ததற்கான தொகை ரூ.5 லட்சத்து 34,625, சேவைக் குறைபாடு மற்றும் மன உளைச்சலுக்கு நஷ்டஈடு ரூ.1 லட்சம், வழக்கு செலவுத் தொகை ரூ.10 ஆயிரம் என மொத்தம் ரூ.6 லட்சத்து 44,625 வழங்க வேண்டும் என உத்தரவிட்டனா்.