வேலம்மாள் வித்யாஷ்ரம் பள்ளி சேவையை பாராட்டி விருது

திருவள்ளூா் அருகே வேலம்மாள் வித்யாஷ்ரம் மெட்ரிக். பள்ளியின் பல்வேறு சமூக சேவையை பாராட்டி தனியாா் நிறுவனம் சாா்பில் விருது வழங்கப்பட்டது.

திருவள்ளூா் அருகே செவ்வாப்பேட்டையில் வேலம்மாள் வித்யாஷ்ரம் மெட்ரிக். மேல்நிலைப் பள்ளி செயல்பட்டு வருகிறது. இந்தப் பள்ளியில் 1000-க்கும் மேற்பட்டோா் பயின்று வருகின்றனா். இந்தப் பள்ளியில் பயின்ற கீா்த்தனா என்ற மாணவி காமன்வெல்த் போட்டியில் பங்கேற்று பளுத்தூக்கும் பிரிவில் தங்கப் பதக்கம் வென்றாா். அப்போது, அந்த மாணவியின் முழு படிப்புச் செலவையும் ஏற்றுக்கொள்வதாக பள்ளியின் தாளாளா் சுடலைமுத்துப்பாண்டியன் அறிவித்தாா்.

அதைத் தொடா்ந்து, மறைந்த தொழிலதிபா் ரத்தன் டாடா புகழை நினைவு கூரும்வகையில், 1,000 பள்ளி மாணவ, மாணவிகள் பங்கேற்ற நிகழ்ச்சி கின்னஸ் புத்தகத்தில் இடம் பெற்றது. அதேபோல், பள்ளியின் சாா்பில் நெகிழிப் பொருள்களின் பயன்பாட்டை தடுத்தல், மரங்கள் வளா்ப்பதை ஊக்குவித்தல், விபத்தில்லா மாவட்டத்தை உருவாக்க விழிப்புணா்வுப் பேரணி போன்ற சமூக அக்கறை கொண்ட பல்வேறு நிகழ்வுகளை நடத்தியுள்ளது.

இவற்றைப் பாராட்டி பெங்களூருவில் தனியாா் நிறுவனம் சாா்பில் நடத்திய போட்டியில் சிறப்பிடம் பிடித்து பாராட்டுச் சான்றிதழ் மற்றும் விருதை முதல்வா் சதீஷ் சத்தியமூா்த்தியிடம் வழங்கினா். இந்தப் போட்டியில் 42 பள்ளிகள் பங்கேற்றன.