வேலூர்: மாயமான பெண் குழந்தை கிணற்றுக்குள் மிதந்த கொடூரம்; கொலையா? - போலீஸ் தீவிர விசாரணை

வேலூர் மாவட்டம், குடியாத்தம் அருகிலுள்ள தட்டப்பாறை ஏரியின் கீழ்பட்டி பகுதியைச் சேர்ந்தவர் தரணி, விவசாயி. இவரின் இரண்டரை வயது பெண் குழந்தை ஜெயப்பிரியா, கடந்த 28-ம் தேதி மாலை வீட்டருகே விளையாடிக்கொண்டிருந்தபோது திடீரென மாயமானாள்.

அக்கம், பக்கத்தில் தேடியும் குழந்தை கிடைக்காததால், குடியாத்தம் தாலுகா காவல் நிலையத்தில் பெற்றோர் புகாரளித்தனர். அன்று இரவில் இருந்தே போலீஸார் குழந்தையை தேடும் முயற்சியில் தீவிரமாக ஈடுபட்டனர். தனிப்படை அமைத்தும் பல்வேறு கோணங்களில் விசாரணை முடுக்கி விடப்பட்டது. மோப்ப நாய் சாரா வரவழைக்கப்பட்டும், துப்பு ஏதும் கிடைக்கவில்லை. தீயணைப்புத் துறையினரும் வரவழைக்கப்பட்டு அக்கம், பக்கத்து கிணறுகளில் உள்ள தண்ணீரை வெளியேற்றி, அதிலும் தேடப்பட்டது.

இந்த நிலையில், நேற்று மாலை... குழந்தை காணாமல்போன இடத்தில் இருந்து சுமார் அரை கிலோ மீட்டர் தூரத்திலுள்ள் பாழடைந்த கிணற்றில் பார்த்தபோது, அந்த கிணற்றுக்குள் குழந்தையின் சடலம் மிதந்துகொண்டிருந்தது. உடனடியாக உயரதிகாரிகளுக்கு தகவல் தெரிவிக்கப்பட்டதையடுத்து, போலீஸார் அந்த கிணற்றைச் சுற்றி குவிக்கப்பட்டனர். தகவலறிந்ததும், குழந்தையின் பெற்றோர், உறவினர்கள், ஊர்க்காரர்கள் என ஏராளமானோரும் அங்கு திரண்டு கதறி அழுதனர்.

இதையடுத்து, தீயணைப்பு வீரர்கள் கிணற்றுக்குள் இறங்கி குழந்தையின் உடலை போர்வை மூலம் கட்டி மேலே கொண்டுவந்தனர். அங்கேயே தடய அறிவியல் துறையினர் குழந்தையின் உடலை ஆய்வு செய்தனர். மேலும், பெற்றோரிடம் குழந்தையின் உடலை காண்பித்து அடையாளத்தை உறுதிப்படுத்திக்கொண்டனர்.

தொடர்ந்து, குழந்தையின் உடல் பிரேத பரிசோதனைக்காக வேலூர் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டது. இரண்டரை வயது குழந்தை அரை கிலோ மீட்டர் தூரத்துக்கு எப்படி நடந்து சென்றிருக்க முடியும்? மாயமான அன்று அமாவாசை. எனவே, இருட்டில் குழந்தையை யாரேனும் கடத்திச் சென்றிருக்கலாம் என்கிற சந்தேகமும் எழுந்திருக்கிறது. விசாரணையின் முடிவில், இந்தச் சம்பவத்தில் பல்வேறு அதிர்ச்சிகர தகவல்களும் வெளியாகலாம் என்றும் காவல்துறையினரின் வட்டாரத்தில் இருந்து தெரிவிக்கப்படுகிறது. பெரும் அதிர்ச்சியை ஏற்படுத்தியிருக்கும் இவ்வழக்கில், போலீஸாரும் மிக கவனமுடன் விசாரணையை தீவிரப்படுத்தியிருக்கின்றனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்https://bit.ly/3OITqxs

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3OITqxs