அண்ணா பல்கலை.யில் பாலியல் புகார்: மாணவர்கள் போராட்டம் வாபஸ்!
நிகழாண்டில் பெறப்பட்ட மொத்தம் 7 கோடி வேலை விண்ணப்பங்களில் 40 சதவீதம் பெண்களுடையது (2.8 கோடி) என்றும் இது கடந்த ஆண்டின் எண்ணிக்கையைவிட 20 சதவீதம் அதிகம் என்றும் தகவல் வெளியாகியுள்ளது.
‘ஆப்னா.கோ’ வேலைவாய்ப்புத் தளம் வெளியிட்ட நிகழாண்டுக்கான இந்திய பணிச் சூழல் குறித்த அறிக்கையின்படி, நிகழாண்டில் மொத்தம் 7 கோடி வேலை விண்ணப்பங்கள் தளத்தில் பெறப்பட்டன. இந்த எண்ணிக்கை கடந்தாண்டைவிட 25 சதவீதம் அதிகமாகும். 7 கோடியில் பெண்களுடைய விண்ணப்பங்களின் எண்ணிக்கை மட்டுமே சுமாா் 2.8 கோடி ஆகும்.
தில்லி, பெங்களூரு, மும்பை போன்ற முதல்நிலை நகரங்களில் இருந்து 1.52 கோடி விண்ணப்பங்களும் ஜெய்பூா், லக்னெள, போபால் போன்ற இரண்டாம், மூன்றாம் நிலை நகரங்களில் இருந்து 1.28 கோடி விண்ணப்பங்களும் பெறப்பட்டுள்ளன. பெரு நகரங்களை தாண்டியும் வாய்ப்புகள் கொட்டிக்கிடைப்பதை இது காட்டுகிறது.
முந்தைய ஆண்டைவிட நிகழாண்டில் பெண்களின் சராசரி ஊதியம் 28 சதவீதம் அதிகரித்துள்ளது. சுகாதாரம், விருந்தோம்பல், சில்லறை மற்றும் இணைய வா்த்தகம் போன்ற துறைகளில் பெண்கள் சிறந்து விளங்குகின்றனா். கள விற்பனை, தளவாட போக்குவரத்து, பாதுகாப்பு சேவைகள் போன்ற தங்கள் வழக்கத்துக்கு மாறான வேலைவாய்ப்புகளையும் அவா்கள் ஏற்று வருகின்றனா்.
மூத்த மற்றும் நிா்வாகப் பணிகளுக்கான பெண்களின் விண்ணப்பங்கள் 32 சதவீதம் அதிகரித்துள்ளன. இதேபோல், பணிக்குப் புதியவா்களிடமிருந்தும் மொத்தம் 2 கோடி வேலை விண்ணப்பங்கள் பெறப்பட்டுள்ளன. கடந்த ஆண்டை ஒப்பிடுகையில், இந்த எண்ணிக்கை 27 சதவீதம் அதிகரித்துள்ளது.
சென்னை, பெங்களூரு, ஹைதராபாத் போன்ற தென்னிந்திய நகரங்களில் இருந்து 60 லட்சம் விண்ணப்பங்கள் பெறப்பட்டுள்ளன. அதேநேரத்தில் பஞ்சாப், உத்தர பிரதேசம், ராஜஸ்தான் மற்றும் பிகாா் போன்ற வட மாநிலங்களில் இருந்து 82 லட்சம் விண்ணப்பங்கள் பெறப்பட்டுள்ளன. இது சமநிலையான பிராந்திய பங்களிப்பைக் காட்டுகிறது என தெரிவிக்கப்பட்டுள்ளது.
