அதிமுக - பாஜக கூட்டணியை உடைக்க முடியாது: நயினாா் நாகேந்திரன்

அதிமுக - பாஜக கூட்டணியை உடைக்கும் முயற்சி நிறைவேறாது என்று தமிழக பாஜக தலைவா் நயினாா் நாகேந்திரன் உறுதிபடத் தெரிவித்தாா்.

சென்னை தியாகராய நகரில் உள்ள கமலாலயத்தில் புதன்கிழமை நடைபெற்ற மிசா தியாகிகள் பொன் விழாவில் சிறப்புரையாற்றிய அவா் செய்தியாளா்களிடம் கூறியதாவது:

2021 சட்டப்பேரவைத் தோ்தலின்போது, திமுகவின் தோ்தல் அறிக்கையில் அளித்த வாக்குறுதிப்படி, சமையல் எரிவாயு விலையை முதல்வா் ஸ்டாலின் குறைப்பாரா? அதேபோல, தோ்தல் அறிக்கையில் பெட்ரோல், டீசல் விலையைக் குறைப்பதாக வாக்குறுதி அளித்தனா். 4 ஆண்டுகள் ஆகியும் இதுவரை சமையல் எரிவாயு, பெட்ரோல் விலையைக் குறைக்கவில்லை.

அதிமுக - பாஜக கூட்டணி இறுதியானது; உறுதியானது. அதிமுக - பாஜக கூட்டணியை உடைக்கும் முயற்சிகள் நடக்கின்றன. ஆனால், அது நிறைவேறாது.

மதுரையில் நடைபெற்ற முருக பக்தா்கள் மாநாடு புதிய திருப்பத்தை ஏற்படுத்தியுள்ளது. பாஜகவுக்கு யாா் வந்தாலும் வரவேற்போம். ஹிந்து மதத்தில் எங்கும் பாகுபாடு கிடையாது. ஹிந்து என்பது ஒரு வாழ்வியல் முறை என்றாா் அவா்.

விழாவில், பாஜக மூத்த தலைவா் ஹெச்.ராஜா, முன்னாள் எம்.பி. எஸ்.கே.காா்வேந்தன், மிசா தியாகிகள் சங்க மாநிலத் தலைவா் எம்.கந்தகுமாா், மாநில பொதுச் செயலா் ஜி.பாபு உள்ளிட்டோா் பங்கேற்றனா்.