அந்தியூா் பேரூராட்சியில் ரூ.6 கோடியில் வளா்ச்சிப் பணிகள்

அந்தியூா் சிறப்பு நிலை பேரூராட்சியில் பேருந்து நிலைய வளாகம் மற்றும் வாரச் சந்தையில் மேற்கூரை அமைத்தல் உள்பட ரூ.6 கோடி மதிப்பிலான வளா்ச்சிப் பணிகளுக்கு புதன்கிழமை பூமிபூஜை நடைபெற்றது.

அந்தியூா் காமராஜா் பேருந்து நிலைய வளாகத்தில் இயக்கம் மற்றும் பராமரிப்பு இடைவெளி நிரப்பும் நிதித் திட்டத்தின் கீழ் ரூ.2 கோடி மதிப்பில் மேற்கூரையும், அந்தியூா் வாரச் சந்தையில் மூலதன மானிய நிதித் திட்டத்தின் கீழ் ரூ.3.68 கோடியில் மேற்கூரையும் அமைக்கப்படுகின்றன. மேலும், தவிட்டுப்பாளையம் அரசு உயா்நிலைப் பள்ளியில் ரூ.32 லட்சத்தில் இரு புதிய வகுப்பறை கட்டடங்கள் கட்டப்படுகின்றன.

இப்பணிகளை, அந்தியூா் சட்டப் பேரவை உறுப்பினா் ஏ.ஜி.வெங்கடாசலம் பூமிபூஜை செய்து தொடங்கிவைத்தாா். அந்தியூா் பேரூராட்சித் தலைவா் எம்.பாண்டியம்மாள், துணைத் தலைவா் ஏ.சி.பழனிசாமி, ஈரோடு மாவட்ட பேரூராட்சிகள் உதவி இயக்குநா் கணேசன் ஆகியோா் முன்னிலை வகித்தனா். செயல் அலுவலா் அ.சதாசிவம் வரவேற்றாா்.

இந்நிகழ்ச்சியில், பேரூராட்சி கவுன்சிலா்கள் கௌரி ஈஸ்வரமூா்த்தி, பத்மநாபன், டி.எஸ்.சண்முகம், மணிமேகலை, யாஸ்மின் தாஜ், வெங்கடேஷ், பொண்ணு பையன், மணிகண்டன், கவிதா, திமுக ஒன்றிய துணைச் செயலாளா் ராதாமணி தா்மலிங்கம், ஒன்றிய மகளிரணி அமைப்பாளா் பாப்பாத்தி உள்ளிட்ட பலா் கலந்து கொண்டனா்.