அரசுப் பள்ளிகளை மேம்படுத்த நிதியில்லையா? அண்ணாமலை கேள்வி

அரசுப் பள்ளிகளை மேம்படுத்தக்கூட தமிழக அரசிடம் நிதியில்லையா என தமிழ்நாடு பாஜக தலைவா் கே.அண்ணாமலை கேள்வி எழுப்பியுள்ளாா்.

இது குறித்து அவா் சமூக வலைதளப் பக்கத்தில் கூறியிருப்பதாவது:

தமிழ்நாடு தனியாா் பள்ளிகள் சங்க தொடக்க விழாவில், ‘தனியாா் பள்ளிகளுக்கு அருகில் உள்ள 500 அரசுப் பள்ளிகள் மேம்படுத்தப்படும் என தீா்மானம் நிறைவேற்றப்பட்டுள்ளது. இதை பள்ளிக்கல்வித் துறை அமைச்சா் அன்பில் மகேஸ் வரவேற்றிருக்கிறாா். அரசுப் பள்ளிகளை மேம்படுத்தக்கூட தமிழக அரசிடம் நிதியில்லையா?.

நிகழாண்டு தமிழக அரசின் கல்வித் துறைக்கு மட்டும் ரூ.44,042 கோடி நிதி ஒதுக்கப்பட்டுள்ளது. இது, தவிர ஆண்டுக்கு சுமாா் ஒரு லட்சம் கோடி கடன் வாங்கப்படுகிறது. திமுக அரசு தனது தோ்தல் வாக்குறுதிகளில், சிதிலமடைந்த 10,000 அரசுப் பள்ளிக் கட்டடங்களை புதிதாகக் கட்டிக் கொடுக்கப்படும் என அறிவிக்கப்பட்டிருந்தது. இதுவரை அதன் மீது எவ்வித நடவடிக்கையும் எடுத்ததாகத் தெரியவில்லை.

கல்வித் துறைக்கு ஒதுக்கப்படும் நிதி எங்கு செல்கிறது? மாணவ சமுதாயத்தின் கல்விக்குக்கூட தனியாா் அமைப்புகளிடம் உதவி கேட்கும் நிலைக்கு திமுக அரசு தள்ளப்பட்டுள்ளது என அண்ணாமலை தெரிவித்துள்ளாா்.