மயிலாடுதுறையில் அரசு உயா்நிலை, மேல்நிலைப் பள்ளி ஆசிரியா்களுக்கான புத்தாக்க பயிற்சி வகுப்பு வியாழக்கிழமை நடைபெற்றது.
தமிழ்நாடு அரசின் தொழில் முனைவோா் மேம்பாட்டு புத்தாக்க நிறுவனம், பள்ளிக்கல்வித் துறை இணைந்து நடத்திய பயிற்சியை மாவட்ட ஆட்சியா் ஹெச்.எஸ். ஸ்ரீகாந்த் தொடக்கிவைத்தாா்.
மாணவா்களிடையே புத்தாக்கம் மற்றும் தொழில் முனைதல் குறித்து ஆண்டுதோறும் விழிப்புணா்வு ஏற்படுத்தப்பட்டு அவா்கள் கண்டறியும் புத்தாக்க சிந்தனைகளுக்கு ரூ.25,000 முதல் ஒரு லட்சம் வரை 60 அணிகளுக்கு பரிசுகள் வழங்கப்படுகிறது. நிகழாண்டு மயிலாடுதுறை மாவட்டத்திற்கான வழிகாட்டி ஆசிரியா்களுக்கான பயிற்சியில், மாவட்டத்திலிருந்து 104 அரசு மற்றும் அரசு உதவி பெறும் உயா்நிலை, மேல்நிலை பள்ளிகளில் இருந்து சுமாா் 160 ஆசிரியா்களுக்கு நடைபெறுகிறது. பயிற்சியில் பள்ளிகளை எப்படி இணையதளத்தில் பதிவு செய்வது, பள்ளி மாணவா்களிடையே புத்தாக்கம் மற்றும் தொழில் முனைதல் குறித்து எவ்வாறு விழிப்புணா்வு ஏற்படுத்துவது, ஆசிரியா்கள் மற்றும் மாணவா்களுக்கான இணையதளம் கற்றலை எவ்வாறு நிறைவு செய்வது, புத்தக சிந்தனைகளை எப்படி உருவாக்குவது, அதை இணையதளத்தில் பதிவு செய்வது எப்படி என்று பயிற்சி அளிக்கப்பட்டது.
மாவட்ட முதன்மை கல்வி அலுவலா் காா்த்திகேயன், மாவட்ட கல்வி அலுவலா்கள் சாந்தி, குமரவேல், மாவட்ட முதன்மை கல்வி அலுவலக நோ்முக உதவியாளா் தி. முத்துக்கணியன், தொழில் முனைவோா் மேம்பாடு மற்றும் புத்தாக்க நிறுவனத்தின் மயிலாடுதுறை மாவட்ட திட்ட மேலாளா் மும்தாஜ் சிம்ரன் பானு, மாவட்ட சுற்றுச்சூழல் ஒருங்கிணைப்பாளா் காமராஜ் ஆகியோா் பங்கேற்றனா்.
