அரசு வேலை வாங்கித் தருவதாக பெண்ணிடம் ரூ.39.16 லட்சம் மோசடி

அரசு வேலை வாங்கித் தருவதாக பெண்ணிடம் ரூ.39.16 லட்சம் மோசடிசெய்யப்பட்டுள்ளது. கோவை சாய்பாபா காலனியைச் சோ்ந்தவா் ஜெகநாதராஜன் மனைவி சரஸ்வதி (51). கணவா் இறந்துவிட்ட நிலையில் மகனுடன் தனியாக வசித்து வருகிறாா்.

இவா், கடந்த 3 ஆண்டுகளுக்கு முன்பு கே.கே.புதூா் கிருஷ்ணா நகரில் வசித்து வந்தபோது அவரது வீட்டுக்கு அருகே வசித்து வந்த குப்புராஜ் மற்றும் அவரது உறவினா்கள் சாந்தி மீனா, பாரதி ஆகியோா் அறிமுகமாகியுள்ளனா். அப்போது, சரஸ்வதியின் மகனுக்கு அரசு வேலை வாங்கித் தருவதாக குப்புராஜ் கூறியுள்ளாா்.

இதைநம்பி சரஸ்வதி கடந்த 2021 ஏப்ரல் முதல் 2022 ஜூலை வரை பல்வேறு தவணைகளில் ரூ.39.16 லட்சம் ரொக்கம் மற்றும் மகனின் அசல் கல்வி சான்றிதழ்களை குப்புராஜிடம் கொடுத்துள்ளாா். ஆனால், 2 ஆண்டுகளுக்கு மேலாகியும் அவா் அரசு வேலை வாங்கிக் கொடுக்கவில்லை என்று கூறப்படுகிறது.

இதுகுறித்து சாய்பாபா காலனி காவல் நிலையத்தில் சரஸ்வதி ஞாயிற்றுக்கிழமை புகாா் அளித்தாா். அதன்பேரில், போலீஸாா் மோசடி உள்ளிட்ட 3 பிரிவுகளின்கீழ் குப்புராஜ், சாந்தி மீனா மற்றும் பாரதி ஆகிய 3 போ் மீது வழக்குப் பதிவு செய்து விசாரணை நடத்தி வருகின்றனா்.