அழுகிய நிலையில் இளைஞரின் சடலம் மீட்பு

கோவை, சிங்காநல்லூரில் வீட்டுக்குள் அழுகிய நிலையில் கிடந்த இளைஞரின் சடலத்தை மீட்டு போலீஸாா் விசாரணை நடத்தி வருகின்றனா்.

தேனி மாவட்டம், போடிநாயக்கனூா் அருகேயுள்ள டிவிகே நகா் 7-ஆவது தெருவைச் சோ்ந்தவா் சடையாண்டி மகன் அசோக்குமாா் (28). இவா் கோவை மாவட்டம், சிங்காநல்லூா் பகுதியில் வாடகை வீட்டில் தங்கி, தனியாா் நிறுவனத்தில் பணியாற்றி வந்தாா்.

பெற்றோருடன் அவ்வப்போது கைப்பேசியில் பேசி வந்த நிலையில், கடந்த சில நாள்களாக அசோக்குமாா் பேசவில்லையாம். அவரது கைப்பேசி எண்ணைத் தொடா்பு கொண்டும் பேச முடியாததால், அசோக்குமாரின் நண்பரான சுஜித் என்பவரைத் தொடா்பு கொண்டு சடையாண்டி விசாரித்துள்ளாா்.

இதையடுத்து, அசோக்குமாா் வேலை செய்து வந்த நிறுவனத்துக்கு சுஜித் சென்று கேட்டபோது, அவா் நவம்பா் 21-ஆம் தேதியிலிருந்து பணிக்கு வரவில்லை என்பது தெரியவந்தது.

தொடா்ந்து, அசோக்குமாா் வீட்டுக்கு சுஜித் ஞாயிற்றுக்கிழமை சென்று பாா்த்தபோது, அவா் உயிரிழந்து கிடந்தது தெரியவந்தது. மேலும், அவரது சடலம் அழுகிய நிலையில் இருந்துள்ளது.

இது குறித்து சடையாண்டிக்கும், சிங்காநல்லூா் போலீஸாருக்கும் சுஜித் தகவல் தெரிவித்தாா்.

சம்பவ இடத்துக்கு வந்த போலீஸாா், சடலத்தை மீட்டு உடற்கூறாய்வுக்காக கோவை அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இச்சம்பவம் குறித்து வழக்குப் பதிவு செய்து விசாரணை நடத்தி வருகின்றனா்.