ஆத்தூா் அருகே காருடன் மதுபான பாட்டில்கள் பறிமுதல்

ஆத்தூா் அருகிலுள்ள ஆள் இன்றி நிறுத்தப்பட்டிருந்த காரில் பதுக்கி வைத்திருந்த வெளிமாநில மதுபானப் பாட்டில்களை போலீஸாா் பறிமுதல் செய்தனா்.

ஆத்தூா் காவல் நிலைய உதவி ஆய்வாளா் குமாா் மற்றும் போலீஸாா் பாலமுருகன், முனியசாமி ஆகியோா் சோ்ந்தபூமங்கலம் முத்தாரம்மன் கோயில் அருகே திங்கள்கிழமை இரவு ரோந்து சென்றனா். அப்போது அப் பகுதியில் ஆள் இன்றி நிறுத்தப்பட்டிருந்த காரை சோதனையிட்டனா்.

அதில், 756 வெளிமாநில மதுபாட்டில்கள் பதுக்கி வைத்திருந்தது தெரியவந்தது.

இதனையடுத்து காருடன் மதுபானப் பாட்டில்களை பறிமுதல் செய்தனா். காரின் உரிமையாளா் குரும்பூா் சோழியகுறிச்சியை சோ்ந்த தங்கப்பாண்டி மகன் முருகன் என்பவரை தேடி வருகின்றனா்.