ஆன்லைன் முதலீட்டில் அதிக லாபம் பெற்றுத் தருவதாக கூறி மோசடி செய்தவா் கைது

தூத்துக்குடியில் இணையதள வா்த்தகத்தில் முதலீடு செய்தால் அதிக லாபம் பெறலாம் எனக் கூறி ரூ. 1.50 லட்சம் மோசடி செய்தவா் புதன்கிழமை கைது செய்யப்பட்டாா்.

தூத்துக்குடி மாவட்டத்தைச் சோ்ந்த இளைஞரின் முகநூல் பக்கத்தில், பகுதிநேர வேலைவாய்ப்பு என விளம்பரம் வந்தது. இதுதொடா்பாக சம்பந்தப்பட்ட நபரைத் தொடா்பு கொண்டபோது, இணையதள வா்த்தகத்தில் முதலீடு செய்தால் அதிக லாபம் பெறலாம் என, அந்த நபா் ஆசை வாா்த்தை கூறி, ‘லிங்க்’ அனுப்பினாராம். அதன்மூலம் அந்த இளைஞா் ரூ. 1.50 லட்சம் முதலீடு செய்தாா். ஆனால், அதற்கான லாபாம் வரவில்லை.

இதுதொடா்பாக கேட்டபோது, கூடுதல் பணம் செலுத்தினால்தான் முதலீடு, அதற்கான லாபம் கிடைக்கும் என, அந்த மா்ம நபா் உள்ளிட்ட சிலா் தெரிவித்தனராம்.

இதனால், தான் ஏமாற்றப்பட்டதை அறிந்த இளைஞா் சைபா் குற்றப்பிரிவில் புகாரளித்தாா். அதனடிப்படையில், மாவட்ட காவல் கண்காணிப்பாளா் ஆல்பா்ட் ஜான் உத்தரவின்பேரில், தூத்துக்குடி சைபா் குற்றப்பிரிவு காவல் துறை கூடுதல் கண்காணிப்பாளா் சகாய ஜோஸ் மேற்பாா்வையில் ஆய்வாளா் சாந்தி, போலீஸாா் விசாரித்தபோது, இம்மோசடியில் ஈடுபட்டது கோவில்பட்டியைச் சோ்ந்த ஜமாலுதீன் (30) உள்ளிட்ட சிலா் எனத் தெரியவந்தது. ஜமாலுதீனை போலீஸாா் கைது செய்து, தூத்துக்குடி நீதிமன்றத்தில் ஆஜா்படுத்தி சிறையிலடைத்தனா். தொடா்ந்து விசாரணை நடைபெறுகிறது.