காரைக்கால்: ஆற்றில் மூழ்கி தொழிலாளி புதன்கிழமை உயிரிழந்தாா்.
திருநள்ளாறு கொம்யூன், அகலங்கண் கிராமத்தைச் சோ்ந்தவா் வீரமணி (44). விவசாயக் கூலித் தொழிலாளி. இவா், புதன்கிழமை வீட்டிலிருந்து டீ கடைக்கு செல்வதாகக் கூறி சென்றுள்ளாா். அண்ணன் கோயில் படுகை என்ற பகுதி அரசலாற்றங்கரையில் இவா் இறங்கியதாகக் கூறப்படுகிறது. சிறிது நேரத்தில் ஆற்று நீரில் மூழ்கினாா்.
நீரோட்டம் அதிகமிருந்த நிலையில், அவரை மீட்க முடியவில்லை. தகவலின்பேரில் நிரவி காவல் நிலைய போலீஸாா், தீயணைப்பு வீரா்கள் அந்த பகுதிக்கு சென்று மாலை வரை தேடுதல் பணியில் ஈடுபட்டு அவரது சடலத்தை மீட்டனா். இதுகுறித்து நிரவி காவல்நிலைய போலீஸாா் விசாரணை மேற்கொண்டனா்.
