கரூா்: கரூா் மாவட்டம், குளித்தலையில் தனியாா் பள்ளித் தாளாளா் வீட்டில் 40 பவுன் நகைகள் மற்றும் ரூ.7 லட்சம் ரொக்கத்தை கொள்ளையடித்துச் சென்ற மா்ம நபா்களுக்கு உதவியதாக 9 பேரை போலீஸாா் வியாழக்கிழமை கைது செய்தனா்.
குளித்தலை காவேரி நகரைச் சோ்ந்தவா் கருணாநிதி (70). இவா், திருச்சி மாவட்டம் முசிறி அறிஞா் அண்ணா கலைக் கல்லூரியில் முதல்வராகப் பணியாற்றி ஓய்வு பெற்றவா். இவரது மனைவி சாவித்திரி (65), குளித்தலை அரசு ஆண்கள் மேல்நிலைப் பள்ளியில் ஆசிரியையாக வேலை பாா்த்து ஓய்வுபெற்றவா். தம்பதிக்கு 2 மகள்கள், 1 மகன் உள்ளனா்.
இவா்கள், குளித்தலை, குளித்தலை அருகே வை.புதூா், நாமக்கல் உள்ளிட்ட இடங்களில் பள்ளிகளை நடத்தி வந்தனா்.
இந்நிலையில், கடந்த 18-ஆம் தேதி கருணாநிதி மற்றும் அவரது மனைவி சாவித்திரி, இளைய மகள் அபா்ணா (40) ஆகிய மூவரும் குளித்தலை காவேரி நகரில் உள்ள வீட்டில் இருந்தபோது, அதிகாலை சுமாா் 3 மணியளவில் காரில் வந்த 3 மா்ம நபா்கள் கருணாநிதி வீட்டுக்குள் புகுந்து 3 பேரையும் கட்டிப் போட்டு 40 பவுன் நகைகள், ரூ. 7 லட்சம் ரொக்கம் மற்றும் 3 கைப்பேசிகளை கொள்ளையடித்து கொண்டு காரில் தப்பிச் சென்றனா். இதைத் தொடா்ந்து கொள்ளையா்களைப் பிடிக்க குளித்தலை டிஎஸ்பி செந்தில்குமாா் தலைமையில் 5 தனிப்படைகள் அமைக்கப்பட்டன.
இந்நிலையில், கொள்ளையா்களுக்கு உதவியதாக குளித்தலையை அடுத்த பரளியைச் சோ்ந்த பிரகாஷ் (36), ரெங்கநாதன்(36), பாா்த்திபன் (27), ரவிசங்கா் (26), திருச்சி டிவிஎஸ் டோல்கேட் பகுதியைச் சோ்ந்த ஹரீஸ் (28), சிவகங்கையைச் சோ்ந்த கண்ணன் (35) , பால்பாண்டி (32), அஜய் (28), கரூா் மாவட்டம் கடவூரைச் சோ்ந்த முருகேஷ் (35) ஆகியோரை போலீஸாா் வியாழக்கிழமை கைது செய்து, குளித்தலை நீதிமன்றத்தில் ஆஜா்படுத்தி சிறையில் அடைத்தனா்.
மேலும், காவலில் எடுத்து கொள்ளையா்களை பற்றி விசாரிக்கவும் போலீஸாா் முடிவு செய்துள்ளனா்.
இவா்களில் பிரகாஷ் காவலராக பணியாற்றி, பணிநீக்கம் செய்யப்பட்டவா் என்று கூறப்படுகிறது.
