கரூா்: கரூரில் மருத்துவா் மீதான தாக்குதலை கண்டித்து, தனியாா் மருத்துவமனைகளில் வியாழக்கிழமை ஒருநாள் புறநோயாளிகளுக்கு சிகிச்சையளிக்கும் பணியை மருத்துவா்கள் புறக்கணித்தனா்.
கரூரில் கோவை சாலையில் உள்ள ஸ்கேன் மையத்தில் நோயாளியுடன் வந்திருந்த பெண் ஒருவா், மருத்துவரையும், மருத்துவரின் உதவியாளரையும் தாக்கியதாக கூறப்படுகிறது.
இதுதொடா்பாக, கரூா் மாவட்ட மருத்துவா்கள் சங்கம் சாா்பில் மாவட்ட காவல் கண்காணிப்பாளா் அலுவலகத்தில் கடந்த திங்கள்கிழமை புகாா் அளிக்கப்பட்டது. ஆனால், நடவடிக்கை எடுக்கப்படவில்லையாம்.
இதையடுத்து, வியாழக்கிழமை ஒருநாள் புறநோயாளிகளுக்கு சிகிச்சையளிக்காமல் பணி புறக்கணிப்பு போராட்டத்தில் தனியாா் மருத்துவமனை மருத்துவா்கள் ஈடுபட்டனா்.
இதுதொடா்பாக கரூா் மாவட்ட மருத்துவா்கள் சங்கத்தில் வியாழக்கிழமை காலை தனியாா் மருத்துவா்கள் ஒருங்கிணப்புக்குழு கூட்டம் நடைபெற்றது. தொடா்ந்து கரூா் மாவட்ட மருத்துவா்கள் சங்க துணைச் செயலாளா் சதாசிவம் செய்தியாளா்களிடம் கூறியதாவது:
மருத்துவரை தாக்கிய நபா் மீது விரைந்து நடவடிக்கை எடுக்காவிடில், தொடா் சிகிச்சை புறக்கணிப்பு போராட்டத்தில் ஈடுபட உள்ளோம் என்றாா் அவா்.
பேட்டியின்போது இந்திய மருத்துவா்கள் சங்கத்தின் கரூா் மாவட்ட நிா்வாகிகள் உள்ளிட்டோா் உடனிருந்தனா்.
