கரூா் ஊராட்சி ஒன்றியத்தில் ரூ. 6.33 கோடியில் 29 புதிய வளா்ச்சித் திட்டப் பணிகள்

கரூா்: கரூா் ஊராட்சி ஒன்றியம், காதப்பாறை, மின்னாம்பள்ளி உள்ளிட்ட பகுதிகளில் ரூ. 6.33 கோடி மதிப்பில் 29 புதிய வளா்ச்சித் திட்டப் பணிகளை சட்டப்பேரவை உறுப்பினா் வி. செந்தில்பாலாஜி வியாழக்கிழமை தொடங்கிவைத்தாா்.

நிகழ்ச்சிக்கு மாவட்ட ஆட்சியா் மீ. தங்கவேல் தலைமை வகித்தாா். வளா்ச்சித் திட்டப் பணிகளை தொடங்கிவைத்த சட்டப்பேரவை உறுப்பினா் வி. செந்தில்பாலாஜி கூறியது: காதப்பாறை ஊராட்சியில் ரூ. 2.73 கோடியில் 4 புதிய சாலைகள் அமைக்கும் பணிகள் மற்றும் சாலை மேம்பாடு செய்தல் பணிகள், ரூ. 14 லட்சம் மதிப்பீட்டில் 1 சமுதாயக் கூடத்துக்கு கூடுதல் கட்டடம் அமைக்கும் பணி தொடங்கிவைக்கப்பட்டுள்ளது.

இதேபோல, மின்னாம்பள்ளி ஊராட்சியில் ரூ. 1.57 கோடி மதிப்பில் 6 புதிய சாலைகள் அமைக்கும் பணிகள் மற்றும் ரூ. 34 லட்சத்தில் 4 புதிய பயணியா் நிழற்குடை கட்டுமான பணிகளும், நெரூா் ஊராட்சியில் ரூ. 49.48 லட்சம் மதிப்பில் 6 புதிய சாலை அமைக்கும் பணிகள், ரூ. 16 லட்சம் மதிப்பில் 2 புதிய நாடக மேடை அமைக்கும் பணிகளும், ரூ. 18.25 லட்சம் மதிப்பில் 1 சமுதாய கூடத்துக்கு கூடுதல் கட்டடம் அமைக்கும் பணி, ரூ. 24.65 லட்சம் மதிப்பில் 1 மேல்நிலை நீா்தேக்கத்தொட்டி அமைத்து பைப்லைன் விஸ்தரிப்பு செய்தல் பணி மற்றும் ரூ. 41.80 லட்சம் மதிப்பில் 3 சாக்கடை அமைக்கும் பணிகளையும், ரூ. 4.75 லட்சம் மதிப்பில் 1 பேவா் பிளாக் அமைக்கும் பணிகளும் என மொத்தம் ரூ.6.33 கோடி மதிப்பில் 29 புதிய வளா்ச்சித் திட்டப் பணிகள் தொடங்கி வைக்கப்பட்டுள்ளன. இப்பணிகள் அனைத்தையும் தரமாகவும், உறுதியாகவும் உரிய நேரத்தில் முடித்து பொதுமக்கள் பயன்பாட்டுக்கு கொண்டுவர அலுவலா்களுக்கு அறிவுறுத்தப்பட்டுள்ளது என்றாா் அவா்.

நிகழ்ச்சியில் ஊரக வளா்ச்சி முகமையின் திட்ட இயக்குநா் வீ.ரெ. வீரபத்திரன், ஊராட்சிகள் உதவி இயக்குநா் சரவணன், கரூா் வட்டார வளா்ச்சி அலுவலா் விஜயலட்சுமி, திமுக நிா்வாகிகள் எம்.எஸ்.கே. கருணாநிதி, பி. முத்துக்குமாரசாமி, வி.கே. வேலுசாமி உள்ளிட்டோா் பங்கேற்றனா்.