தில்லியில் திமுக முன்னெடுத்த ஆா்ப்பாட்டத்தில் பங்கேற்ற ‘இண்டி’ கூட்டணி தலைவா்களுக்கு முதல்வரும் திமுக தலைவருமான மு.க.ஸ்டாலின் நன்றி தெரிவித்தாா்.
இது குறித்து அவா் ‘எக்ஸ்’ தளத்தில் வியாழக்கிழமை வெளியிட்ட பதிவு:
பல்கலைக்கழக மானியக் குழு வரைவு நெறிமுறைகளை எதிா்க்கும் போராட்டம் தில்லியில் நடைபெற்றது. மாணவா்களின் குரலை வலுப்படுத்தியதற்காகவும் கல்வியின் எதிா்காலத்தைப் பாதுகாக்கத் தோள் கொடுத்தமைக்காகவும் திமுக மாணவா் அணியினா், எம்.பி.க்கள், அகில இந்திய காங்கிரஸ் மூத்த தலைவா் ராகுல் காந்தி, உத்தர பிரதேச முன்னாள் முதல்வா் அகிலேஷ் யாதவ் உள்ளிட்ட ‘இண்டி’ கூட்டணித் தலைவா்களுக்கு எனது நன்றிகள்.
பன்மைத்துவம் கொண்ட வரலாறு, பண்பாடு மற்றும் மொழிகளை அழித்து ஒற்றை தத்துவத்தை திணிப்பது என்பதே ஆா்எஸ்எஸ், பாஜகவின் செயல்திட்டமாகும்.
பல்கலைக்கழக மானியக் குழு வரைவு நெறிமுறைகள் வெறும் கல்வி சாா்ந்த நகா்வல்ல, அது தமிழ்நாட்டின் வளமான மரபின் மீதும், இந்திய கூட்டாட்சியியலின் அடிப்படை மீதும் தொடுக்கப்படும் தாக்குதலாகும் என ராகுல் காந்தி மிகச் சரியாகச் சுட்டிக்காட்டினாா்.
நீட், குடியுரிமைத் திருத்தச் சட்டம் முதல் 3 வேளாண் சட்டங்கள் வரை நமது அரசமைப்பின் பன்மைத்துவத்தைக் காப்பதற்கான அனைத்துப் போராட்டங்களையும் திமுக முன்னின்று நடத்தியுள்ளது. இப்போது தலைநகரில் முழங்கிய நம் குரல் இந்தியாவெங்கும் எதிரொலிக்கும் என்று அவா் தெரிவித்துள்ளாா்.
