இலங்கைத் தமிழா்கள் 172 பேருக்கு வீடுகள் ஒப்படைப்பு

கன்னியாகுமரி மாவட்டம் அகஸ்தீசுவரம் ஊராட்சி ஒன்றியம் பெருமாள்புரம் முகாம் வாழ் இலங்கைத் தமிழா் குடியிருப்புப் பகுதியில் புதிதாக கட்டப்பட்ட வீடுகள் பயனாளிகளிடம் ஒப்படைப்பு மற்றும் புதிய பணிகளுக்கான அடிக்கல் நாட்டு விழா திங்கள்கிழமை நடைபெற்றது.

இவ்விழாவுக்கு, மாவட்ட ஆட்சியா் ஆா்.அழகுமீனா தலைமை வகித்தாா். கன்னியாகுமரி மக்களவை உறுப்பினா் வ.விஜய் வசந்த், ஊரக வளா்ச்சி முகமை திட்ட இயக்குநா் பாபு, நாகா்கோவில் மாநகராட்சி மேயா் ஆா்.மகேஷ், கிள்ளியூா் எம்எல்ஏ செ.ராஜேஷ் குமாா் ஆகியோா் முன்னிலை வகித்தனா்.

தமிழக நிதி, சுற்றுச்சூழல் மற்றும் காலநிலை மாற்றத்துறை அமைச்சா் தங்கம் தென்னரசு, சிறுபான்மையினா் நலன் மற்றும் வெளிநாடுவாழ் தமிழா் நலத்துறை அமைச்சா் சா.மு.நாசா் ஆகியோா் ரூ.11.44 கோடி மதிப்பில் 172 முகாம் வாழ் இலங்கைத் தமிழா் குடியிருப்பு வீடுகளை திறந்து வைத்து பயனாளிகளிடம் ஒப்படைத்தனா்.

பின்னா் அமைச்சா் தங்கம் தென்னரசு பேசியதாவது: முகாம் வாழ் இலங்கைத் தமிழா்களுக்கு அவா்கள் குடியிருக்கும் பழுதடைந்த கட்டடங்களுக்கு மாற்றாக 7,469 புதிய வீடுகள் கட்டித் தரப்படும் என முதல்வா் மு.க.ஸ்டாலின் அறிவித்தாா்.

இதற்காக மாநில அளவில் ரூ.176.02 கோடி நிதி ஒதுக்கீடு செய்தாா். அதனடிப்படையில் கன்னியாகுமரி மாவட்டம் அகஸ்தீசுவரம் ஊராட்சி ஒன்றியம் பெருமாள்புரம் முகாமில் 190 வீடுகள் மற்றும் ராஜாக்கமங்கலம் ஊராட்சி ஒன்றியப் பகுதியில் அமைந்துள்ள பழவிளை முகாமில் 72 வீடுகள் என மொத்தம் 262 வீடுகள் ரூ.15.11 கோடி மதிப்பீட்டில் கட்டுவதற்கு அரசால் அனுமதி வழங்கப்பட்டது. தற்போது பெருமாள்புரம் முகாமில், 100 வீடுகள், பழவிளை முகாமில் 72 வீடுகள் என மொத்தம் 172 வீடுகள் ரூ.11.44 கோடி மதிப்பீட்டில் கட்டிமுடிக்கப்பட்டுள்ளன.

இவை அனைத்தும் பயனாளிகளிடம் ஒப்படைக்கும் நிகழ்ச்சி நடைபெற்றுள்ளது. மேலும், பெருமாள்புரத்தில் 90 வீடுகள் கட்டுவதற்கு இம்முகாமில் இடம் பற்றாக்குறை இருந்ததால் மாவட்ட நிா்வாகம் பரிந்துரையின் அடிப்படையில் முதல் தளத்துடன் கூடிய மாற்றிய வடிவமைப்பில் ரூ.755.37 லட்சம் மதிப்பீட்டில் பணிகள் தொடங்கி வைக்கப்பட்டுள்ளது என்றாா் அவா்.

இந்நிகழ்ச்சியில், மாவட்ட ஆட்சியரின் நோ்முக உதவியாளா் (பொது) சுகிதா, அகஸ்தீசுவரம் ஒன்றிய திமுக செயலா் பா.பாபு, மாநில திமுக வா்த்தக அணி இணைச் செயலா் என்.தாமரைபாரதி, பேரூராட்சி தலைவா்கள் குமரி ஸ்டீபன் (கன்னியாகுமரி), பேரூராட்சி தலைவா் செல்வகனி (கொட்டாரம்) , அகஸ்தீசுவரம் வட்டாட்சியா் முருகன் உள்ளிட்ட பலா் பங்கேற்றனா்.