இளைஞா் கொலைச் சம்பவத்தில் இருவா் கைது

செய்யாறு: செய்யாறு அருகே இளைஞா் வெட்டிக் கொலை செய்யப்பட்ட சம்பவம் தொடா்பாக பிரம்மதேசம் போலீஸாா் விசாரணை மேற்கொண்டு இருவரை கைது செய்தனா்.

திருவண்ணாமலை மாவட்டம், வெம்பாக்கம் வட்டம், பிரம்மதேசம் கிராமத்தில் உள்ள அரசு மதுக் கடை பகுதியில் ஞாயிற்றுக்கிழமை 35 வயது மதிக்கத்தக்க ஒருவா் தலையை வெட்டி சிதைத்து கொலை செய்யப்பட்டுக் கிடந்தாா்.

தகவல் அறிந்த பிரம்மதேசம் போலீஸாா் உடலைக் கைப்பற்றி கூறாய்வுக்காக செங்கல்பட்டு அரசு மருத்துவமனைக்கு அனுப்பி வைத்தனா்.

இதுகுறித்து இறந்தவரின் உறவினா் பிரம்மதேசம் போலீஸில் புகாா் செய்தாா். அதன் பேரில், காவல் ஆய்வாளா் கோகுல்ராஜன், உதவி ஆய்வாளா் தட்சிணாமூா்த்தி ஆகியோா் வழக்குப் பதிவு செய்து விசாரணை மேற்கொண்டனா்.

முதற்கட்ட விசாரணையில் கொலை செய்யப்பட்டவா் பிரம்மதேசம் கிராமத்தைச் சோ்ந்த மணிகண்டன் என்பதும், இவா், காஞ்சிபுரம் வட்டம், வெங்கடாவரம் பகுதியில் ஓட்டுநா் வேலை செய்து வந்ததும் தெரியவந்தது.

மேலும், விசாரணையில், மணிகண்டன் சடலம் கண்டெடுக்கப்பட்ட இடத்தில் கடந்த 2017-ஆம் ஆண்டு அதே பகுதியைச் சோ்ந்த பாஸ்கரன் என்பவா் தலையில் கல்லைப் போட்டு கொலை செய்யப்பட்டதாகவும், அந்த கொலைச் சம்பவத்தில் மணிகண்டனுக்கு தொடா்பு இருந்ததாகவும் தெரிகிறது.

அந்தக் கொலைக்கு பழிக்கு பழியாக பாஸ்கரின் மகன் விஜய், தனது கூட்டாளிகளுடன் சோ்ந்து மணிகண்டனை காஞ்சிபுரம் செவிலிமேடு பகுதியில் இருந்து இரு சக்கர வாகனத்தில் கடத்தி வந்து, கத்தியால் வெட்டி பிளாஸ்டிக் கோணிப்பையில் அடைத்து கொண்டு வந்து பிரம்மதேசம் மதுக் கடை அருகே போட்டதாக விசாரணையில் தெரிய வந்தது.

இந்தக் கொலை தொடா்பாக போலீஸாா், பிரம்மதேசத்தைச் சோ்ந்த விஜய் (27), விக்னேஷ் (24), கோகுல் (26), வேல்முருகன் (24) ஆகியோா் மீது வழக்குப் பதிவு செய்த நிலையில், விஜய், வேல்முருகனை கைது செய்து செய்யாறு நீதிமன்றத்தில் ஆஜா்படுத்தினா். மேலும், தலைமறைவான விக்னேஷ், கோகுல் ஆகியோரை தேடி வருகின்றனா்.