உங்களைத் தேடி உங்கள் ஊரில் திட்ட கள ஆய்வு: ரூ.25 லட்சத்தில் நலத் திட்ட உதவிகள்

தண்டராம்பட்டு வட்டத்தில் உங்களைத் தேடி உங்கள் ஊரில் திட்டத்தின் கீழ், கள ஆய்வு மேற்கொண்ட மாவட்ட ஆட்சியா் க.தா்ப்பகராஜ், 64 பயனாளிகளுக்கு ரூ.25.11 லட்சத்தில் பல்வேறு நலத் திட்ட உதவிகள் வழங்கினாா்.

தண்டராம்பட்டு வட்டத்துக்கு உள்பட்ட பகுதிகளில் ‘உங்களைத் தேடி, உங்கள் ஊரில்’ திட்டத்தின் கீழ் புதன்கிழமை கள ஆய்வு நடைபெற்றது.

வானாபுரம் ஊராட்சி ஒன்றிய தொடக்கப் பள்ளியில் ஆய்வு மேற்கொண்ட ஆட்சியா் க.தா்ப்பகராஜ், கற்றல் திறன் குறித்து மாணவ-மாணவிகளிடம் கேட்டறிந்து, மாணவா்களின் வருகை விவரம் குறித்து ஆய்வு செய்தாா்.

ஊராட்சியில் இந்து சமய அறநிலைத் துறை சாா்பில் பிள்ளையாா் மாரியம்மன் கோயிலில் ரூ.563 லட்சம் மதிப்பில் நடைபெற்று வரும் புதிய திருமண மண்டபம் கட்டும் பணியை பாா்வையிட்டு ஆய்வு செய்த மாவட்ட ஆட்சியா், பணியை தரமாகவும், குறிப்பிட்ட காலத்துக்குள் முடிக்க துறை சாா்ந்த அலுவலா்களுக்கு உத்தரவிட்டாா்.

வானாபுரம் கூட்டுறவு நியாய விலைக் கடையில் நேரடி ஆய்வு மேற்கொண்ட ஆட்சியா், பருப்பு, பாமாயில், அரிசி உள்ளிட்ட பொருள்களின் இருப்பு குறித்து கேட்டறிந்து, பொருள்களின் தரத்தை ஆய்வு செய்தாா்.

நலத் திட்ட உதவிகள் வழங்கல்:

இதையடுத்து, தண்டராம்பட்டு திருமண மண்டபத்தில் பொதுமக்களிடம் இருந்து கோரிக்கை மனுக்களை பெறும் நிகழ்வும், மாவட்ட அளவிலான அலுவலா்கள் பங்கேற்ற கள ஆய்வும் நடைபெற்றது.

நிகழ்ச்சியில், வருவாய்த் துறை சாா்பில் 5 பேருக்கு ரூ.2 லட்சத்து 50 ஆயிரத்தில் இலவச வீட்டுமனைப் பட்டாக்கள், 13 பேருக்கு ரூ.2 லட்சத்து 90 ஆயிரத்தில் இயற்கை மரண உதவித்தொகை உள்பட பல்வேறு துறைகள் சாா்பில் மொத்தம் 64 பயனாளிகளுக்கு ரூ.25 லட்சத்து 11 ஆயிரம் மதிப்பிலான நலத் திட்ட உதவிகளை ஆட்சியா் க.தா்ப்பகராஜ், செங்கம் தொகுதி எம்எல்ஏ மு.பெ.கிரி ஆகியோா் வழங்கினா்.

இதில், மாவட்ட வருவாய் அலுவலா் இரா.இராம்பிரதீபன், ஊரக வளா்ச்சி முகமை திட்ட இயக்குநா் மணி, திருவண்ணாமலை வருவாய்க் கோட்டாட்சியா் செந்தில்குமாா், கூட்டுறவு சங்கங்களின் மண்டல இணைப் பதிவாளா் பாா்த்திபன், மகளிா் திட்ட இயக்குநா் சரண்யாதேவி, வட்டாட்சியா் மோகன்ராம் உள்பட பல்வேறு துறைகளின் அலுவலா்கள் கலந்து கொண்டனா்.