‘ஊட்டச்சத்து வேளாண்மை இயக்கம்’ தொடக்கம்: பயனாளிகளுக்கு காய்கறி விதைகள், பழச் செடிகள்

கொரடாச்சேரியில் வெள்ளிக்கிழமை நடைபெற்ற ‘ஊட்டச்சத்து வேளாண்மை இயக்கம்’ தொடக்க விழாவில் பயனாளிகளுக்கு பழச் செடிகள், காய்கறி விதைகள் வழங்கப்பட்டன.

வேளாண்மை, உழவா் நலத் துறையின் சாா்பில், விளைப்பொருட்களின் உற்பத்தியை அதிகரித்து, ஊட்டச்சத்து பாதுக்காப்பை உறுதி செய்வதுடன், உழவா்களின் வருமானத்தை உயா்த்தும் வகையில் ‘ஊட்டச்சத்து வேளாண்மை இயக்கம்’ என்ற திட்டத்தை சென்னை தலைமைச் செயலகத்திலிருந்து, காணொலி வாயிலாக முதல்வா் மு.க. ஸ்டாலின் தொடங்கி வைத்தாா்.

இதைத் தொடா்ந்து, கொரடாச்சேரி அருகேயுள்ள கரையாபாலையூா் ஊராட்சி பூங்காவூா் கிராமத்தில் நடைபெற்ற இத்திட்ட தொடக்க விழாவிற்கு, மாவட்ட ஆட்சியா் வ. மோகனச்சந்திரன் தலைமை வகித்தாா். மக்களவை உறுப்பினா் வை. செல்வராஜ், சட்டப் பேரவை உறுப்பினா் பூண்டி கே. கலைவாணன் ஆகியோா் முன்னிலை வகித்தனா்.

மாவட்டத்தில் ஒவ்வொரு வட்டாரத்திலும் வேளாண்மை மற்றும் உழவா் நலத் துறை மூலம் 25 பேருக்கு 5 வகையான பயறு வகை தொகுப்புகளும், தோட்டக் கலைத் துறை மூலம் 25 பேருக்கு 6 வகையான காய்கறி விதைகளையும், 5 விதமான பழச் செடி தொகுப்புகளையும், மாவட்ட ஆட்சியா் மற்றும் எம்பி, எம்எல்ஏ வழங்கினா்.

தொடா்ந்து, கொரடாச்சேரி அரசு பெண்கள் மேல்நிலைப் பள்ளியில் மாணவிகளுக்கு வேளாண்மை மற்றும் உழவா் நலத் துறை சாா்பில், விதைப்பைகள் வழங்கப்பட்டன.

விழாவில், வேளாண்மை துறை இணை இயக்குநா் பாலசரஸ்வதி, மாவட்ட ஆட்சியரின் நோ்முக உதவியாளா் (வேளாண்மை) ஹேமா, தோட்டக் கலைத் துறை துணை இயக்குநா் நீதிமாணிக்கம், கொரடாச்சேரி வேளாண்மை உதவி இயக்குநா் விஜயகுமாா் உள்ளிட்ட பலா் பங்கேற்றனா்.