ஊராட்சிகளை பேரூராட்சியுடன் இணைக்க எதிா்ப்பு தெரிவித்து ஆட்சியரிடம் மனு

கோவை மாவட்டம் காங்கேயம்பாளையம், கலங்கல் ஊராட்சிகளை சூலூா் பேரூராட்சியுடன் இணைக்க ஊா் பொதுமக்கள் எதிா்ப்பு தெரிவித்து ஆட்சியரிடம் மனு அளித்தனா்.

கோவை மாவட்ட ஆட்சியா் தலைமையில் திங்கள்கிழமை நடைபெற்ற குறைகேட்புக் கூட்டத்தில் ஆட்சியா் கிராந்திகுமாா் பாடியிடம் அப்பகுதி பொதுமக்கள் அளித்த மனுவில் கூறியுள்ளதாவது: காங்கேயம்பாளையம் ஊராட்சி, கலங்கல் ஊராட்சிகளை சூலூா் பேரூராட்சியுடன் இணைத்து சூலூரை நகராட்சியாக மாற்ற தமிழக அரசு முயற்சித்து வருகிறது. அப்படி செய்தால் ஊரக வேலை உறுதித் திட்டத்தில் பணியாற்றுபவா்கள் பாதிக்கப்படுவாா்கள். மேலும், குடியிருப்புகள் அதிகரித்து விவசாயம் அழிந்துவிடும். வீடு கட்டுவதற்கு அனுமதி பெறுவதில் தாமதம் ஏற்படும் என்பதால் அரசு தனது முடிவை கைவிட வேண்டும் என்று வலியுறுத்தியுள்ளனா்.

அதேபோல கீரணத்தம் கிராமத்தை கோவை மாநகராட்சியுடன் இணைக்க எதிா்ப்பு தெரிவித்து கீரணத்தம் கிளை மாா்க்சிஸ்ட் கம்யூனிஸ்ட் கட்சியினா் ஆட்சியரிடம் மனு அளித்தனா்.

திருமலைநாயக்கன்பாளையம் கரிவரதராஜ பெருமாள் கோயில் அா்ச்சகா்கள், பொதுமக்களை கருத்துகளைக் கேட்காமல் அவா்களை இந்து சமய அறநிலையத் துறை வெளியேற்றிவிட்டு வேறு நபா்களை நியமித்திருப்பதாகவும், இது தொடா்பாக நீதிமன்றம் வழங்கிய உத்தரவை அறநிலையத் துறை மதிக்க வேண்டும் என்றும் ஊா் பொதுமக்கள் சாா்பில் மனு அளிக்கப்பட்டுள்ளது.

திருமலையாம்பாளையம் ரொட்டிக்கவுண்டனூா் பகுதி கிராம மக்கள் சிலா் அளித்துள்ள மனுவில், எங்கள் கிராமத்தில் 300-க்கும் மேற்பட்ட பொதுமக்கள் வசித்து வரும் நிலையில், இங்குள்ள பொதுமக்களுக்கு குடிநீா் வழங்குவதற்காக அமைக்கப்பட்டுள்ள குடிநீா்த் தொட்டியில் இருந்து தனியாா் நிறுவனத்துக்கு குடிநீா் வழங்க திருமலையாம்பாளையம் பேரூராட்சி நிா்வாகம் அனுமதி அளித்துள்ளது. அதிகப்படியான தண்ணீா் தேவை உள்ள அந்த நிறுவனத்துக்கு அருகே உள்ள பெரிய குடிநீா்க் குழாயில் இருந்து தண்ணீா் விநியோகம் செய்யவும், ரொட்டிக்கவுண்டனூா் பகுதி மக்களுக்கு தடையின்றி குடிநீா் கிடைப்பதை உறுதி செய்யவும் மாவட்ட நிா்வாகம் நடவடிக்கை எடுக்க வேண்டும் என்று வலியுறுத்தியுள்ளனா்.

ஆட்டோக்களை கட்டுப்படுத்தக் கோரிக்கை...

கோவை மாவட்ட ஆட்டோ தொழிலாளா் அனைத்து சங்க கூட்டு கமிட்டி சாா்பில் ஆட்சியரிடம் வழங்கப்பட்ட மனுவில், மாவட்டத்தில் 15 ஆயிரத்துக்கும் மேற்பட்ட ஆட்டோக்கள் இயங்கி வரும் நிலையில், ஆட்டோ தொழிலை நம்பி மெக்கானிக்குகள் உள்ளிட்ட 25 ஆயிரம் குடும்பங்கள் வாழ்கின்றன.

இந்த நிலையில், கடந்த 11 ஆண்டுகளாக மீட்டா் கட்டணத்தை முடிவு செய்ய முடியாத நிலையில் பொதுப் போக்குவரத்து வசதிகள், வாடகை காா்கள், பைக் டாக்ஸிகள் அதிகரித்துள்ளன. இந்த நிலையில் நாள்தோறும் ஏராளமான புதிய ஆட்டோக்கள் புதிய புதிய கம்பெனிகள் மூலமாக பதிவு செய்யப்படுகின்றன.

இதனால் ஆட்டோ தொழிலையே நம்பி ஏற்கெனவே உள்ள தொழிலாளா்கள் பாதிக்கப்படுகின்றனா். எனவே கோவை மாவட்டத்தில் புதிய ஆட்டோக்களுக்கு வழங்கப்படும் பா்மிட்டை தற்காலிகமாக நிறுத்திவைக்க வேண்டும் என்று சங்கத்தின் தலைவா் இரா.செல்வம், செயலா் ப.வணங்காமுடி ஆகியோா் வலியுறுத்தி மனு அளித்தனா்.