கச்சத்தீவு : `திமுக செய்த தவறால்... தீர்மானம் வெறும் கண்துடைப்பு” - டிடிவி தினகரன் காட்டம்

தேனி மாவட்டம் போடி சட்டமன்றத் தொகுதிக்கு உட்பட்ட அமமுக நிர்வாகிகளுடன் அக்கட்சியின் பொதுச்செயலாளர் டிடிவி தினகரன் ஆலோசனை கூட்டம் நடத்தினார். அப்போது செய்தியாளர்களை சந்தித்த டிடிவி தினகரன், ``வாக்குறுதிகளை நிறைவேற்றாத திமுக அரசின் மக்கள் விரோதப் போக்கு வரும் சட்டமன்றத் தேர்தலில் எதிரொலிக்கும். கடந்த 1974 ஆம் ஆண்டு அப்போதைய முதலமைச்சராக இருந்த கருணாநிதி ஆட்சி காலத்தில் தான் கச்சத்தீவு இலங்கைக்கு தாரை வார்க்கப்பட்டது. அப்போது வாய்மூடி மௌனியாக இருந்த திமுக, கடந்த 2021 சட்டமன்றத் தேர்தலில் கச்சத்தீவை மீட்போம் என்று வாக்குறுதி அளித்தது.

கண்துடைப்பானது

அதன்படி திமுக, ஆட்சி அமைத்து 4 ஆண்டுகளாகியும் அது குறித்து எவ்வித நடவடிக்கையும் எடுக்காததால், தமிழக மீனவர்கள் இலங்கை கடற்படையினரால் தாக்கப்படுவதும், கைது செய்யப்படுவதும், சிறையில் அடைப்பது என பல்வேறு சிரமங்களை சந்தித்து வருகின்றனர். இதனால் திமுக செய்த தவறால் மீனவர்களை மீட்பதே மத்திய அரசின் வேலையாக இருக்கிறது.‌ கச்சத்தீவை மீட்போம் என்று கூறி ஆட்சிக்கு வந்த திமுக, 4 ஆண்டுகளுக்கு பிறகு தற்போது சட்டமன்றத்தில் தனித்தீர்மானம் நிறைவேற்றியது கண்துடைப்பானது.

`நான் கூட்டணியில் இருக்கிறேன் என்பதற்காக கூறவில்லை’

என்னைப் பொறுத்தவரை மத்திய பாஜக அரசு கொண்டு வரக்கூடிய திட்டங்கள் எல்லாம் நாட்டின் வளர்ச்சிக்கு தேவையான தொலைநோக்கு பார்வையுடன் இருக்கிறது. இதை நான் கூட்டணியில் இருக்கிறேன் என்பதற்காக கூறவில்லை. மத்திய பாஜக அரசு கொண்டு வரும் சட்டங்கள் எல்லாம் மக்களுக்கு பொதுவானது, யாரையும் பாதிக்காது. அது போல தான் வக்ஃபு வாரிய சட்டத்தில், ஏதாவது திருத்தங்கள் செய்ய வேண்டும் என்றால், அந்த திருத்தங்களை செய்ய வேண்டும். குறிப்பாக இஸ்லாமியர்கள் எதிர்பார்க்கக்கூடிய திருத்தங்கள் செய்ய வேண்டும். எனவே வக்ஃபுக்கு சொந்தமான சொத்துக்களை பாதுகாக்கும் வகையில் தான் சட்டங்கள் இருக்க வேண்டும் என இஸ்லாமியர்கள் எதிர்பார்க்கிறார்கள்.

தொகுதி மறுவரையால் எந்த மாநிலங்களும் பாதிக்காது என்று மத்திய உள்துறை அமைச்சர் அமித் ஷா கூறியும், அதனை ஏற்காத தமிழக முதலமைச்சர் ஸ்டாலின், அரசியல் காரணங்களுக்காக தொகுதி மறுவரையறை உரிமை மீட்புக் கூட்டத்தை நடத்தியுள்ளார். உண்மையாகவே தமிழ்நாட்டின் மீது அக்கறை இருந்தால் மாநிலத்தின் முக்கிய நீராதாரப் பிரச்சனைகளான முல்லைப்பெரியாறு அணை மற்றும் மேக்கேதாட்டூ விவகாரங்களில் இந்தி கூட்டணி கட்சிகள் ஆளும் கேரள, கர்நாடக மாநில முதலமைச்சர்களுடன் பேச்சுவார்த்தை நடத்தி தீர்வு காணவில்லை” எனக் குற்றம் சாட்டினார்.